” اعتبروني مجنوناً”.. ميدو يكشف سر تفاؤله بتتويج الزمالك بالكونفدرالية رغم الهزيمة امام اتحاد العاصمة
في تصريحات نارية حملت مزيجاً من التفاؤل والتحذير، حلل أحمد حسام ميدو مشهد مباراة العودة بين الزمالك واتحاد العاصمة، مؤكداً أن سيناريو مباراة الذهاب رغم “ألمه” إلا أنه يصب في مصلحة “الفارس الأبيض” تاريخياً وفنياً.
وقال ميدو، خلال تصريحات تليفزيونية ببرنامج “أوضة اللبس”، عبر قناة “النهار”:” سيناريو مباراة الذهاب بين الزمالك واتحاد العاصمة مؤلم، تتقدم بهدف وبعدها يتلغي وترجع مغلوب، مؤلمه للفريق والجماهير، الحقيقه في زملكاويه كتير سيناريو المباراة خلاهم يتشائموا واللي قالوا كده نسيوا سيناريوهات الزمالك في حياتنا، بقعد افكر امتى الزمالك اخد بطولة سهله”.
و أردف: “عمري ما تابعت الزمالك في اي بطولة وكان الفوز بها سهل انا واخد مصل من سيناريوهات الزمالك،، والحاجات دي بتخليني اتفائل اكتر، لان عندي مليون ذكرى بتقولي هناخد البطولة طالما في صعوبات”.
وتابع ميدو:” ونتيجة 1-0 افضل من ال 0-0 واي حد يقول علي مجنون، لكن علشان عارف الزمالك كويس اخاف انه يدخل متعادل 0-0 ، اقولكم ليه لو الزمالك دخل وهو 0-0، نسبه الزمالك يفوز بالبطولة 60-40، انما بالخسارة النسبه. 80-20 والاثنين للزمالك”.
وشدد: ” ولو كان ماتش الذهاب انتهى بالتعادل كان شكل مباراة العودة هتبقى شبه مباراة بلوزداد واخر ربع ساعه فيها الزمالك يتغلب وكنت باقول هيدخل فينا جول لان الزمالك بيلعب على التعادل، ولولا تالق مهدي. سليمان كنا اتلسعنا جول وبره البطوله نفس اللي حصل الموسم الماضي ، واللي كتبته مش علشان اكون ضد التيار لان قولت اعتبروني رجل فقد عقله لكن نتيجه1-0 افضل من 0-0″
و أكمل ميدو: “افتكروا كلامي، الزمالك هينزل بدوافع كبيره وغل من اللعيبه والجمهور وهيخلص الماتش اول نصف ساعه لان اللعيبه جواها غل وحاسه انها اتظلمت،، ولو سالتهم تلعبوا امتى يقولوا لك بكره، انا اخاف على الزمالك قوي والناس مريحه ولازم يبقى احترام كبير للمنافس وعلاج الاخطاء لان كان في اخطاء وامام الاهلي”.
وواصل:” اللعيبه تحت مسئوليات كبيره جدا، لان على عكس ناس كتير بتقول ان اللعيبه مقصرتش، لا لاعبي الزمالك كانوا لازم تطلع كسبانه بسيناريو الماتش بالفرص، الزمالك في الجزائر 3 فرص مؤكدة اجوال، وفي الحدث ده وتضيع الفرص دي لا هيقولوا ميدو بينتقد لا انا بفوق لاعبي الزمالك “.
وأختتم ميدو:” لازم لاعبي الزمالك يبقوا فاهمين ان الجمهور له حق في ماتش العوده، الرساله واضحه الزمالك كان لازم يكسب ولاعبي اتحاد العاصمه كانوا متوترين من جمهورهم وهيلعبوا احسن لان بدون ضغوط وهيلعبوا على التحولات، الماتش صعب بس اللعيبه لازم تفهم ان الجمهور له حق وبيدعمهم بس زعلان من ماتش الاهلي والماتش اللي فات لانه كان لازم تخلص ودي فرصه العمر تخلص”.
