في ليلة حزينة على كرة القدم المصرية، خرج النجم أحمد حسام “ميدو” بتصريحات حزينة تعقيباً على الهبوط الرسمي للنادي الإسماعيلي إلى دوري المحترفين، عقب خسارته أمام وادي دجلة بهدفين لهدف، مؤكداً أن ما حدث هو نتيجة طبيعية لسنوات من التخبط الإداري والمالي.
وقال ميدو، خلال تصريحات تليفزيونية ببرنامج “أوضة اللبس”، عبر قناة “النهار”:” النهاردة للأسف الإسماعيلي بيتأكد هبوطه رسمياً بعد سنوات من المعاناة وسنوات من التخبط، للأسف الإسماعيلي بتاريخه الكبير والإسماعيلي بجمهوره العظيم مش هيكون موجود في الدوري الممتاز السنة اللي جاية’.
وتابع: ” المشهد حزين ومشهد مؤسف إن نادي بحجم وبتاريخ وبشعبية النادي الإسماعيلي يهبط إلى دوري الدرجة أو دوري المحترفين اللي هو دوري الدرجة الثانية”.
وشدد ميدو: “الحقيقة مش هتكلم على جمهور الإسماعيلي كتير لأن جمهور الإسماعيلي الكل يعلم إنه جمهور عظيم وجمهور كرة قدم حقيقي، وجمهور لا يستحق أبداً أبداً أبداً إنه يشوف ناديه بيحصل فيه كده”.
و أردف:” الغلط فين؟ الغلط بكل صراحة على الناس اللي كانت ماسكة الإسماعيلي في وقت من الأوقات، وبتكلم على إدارة وبتكلم على مسؤولين عن تعاقدات وبتكلم عن أولويات فلوس ودفع فلوس. النادي الإسماعيلي في سنة من السنوات باع لعيبة بـ 150 مليون جنيه -ده لسه قريب من أربع خمس سنين- ولكن للأسف المسؤولين عن الفريق في ذلك الوقت خدوا قرار إن هم يصرفوا الفلوس دي غلط، ودي كانت بداية انهيار الإسماعيلي”.
وواصل ميدو: “بداية انهيار الإسماعيلي لما باع لعيبة بـ 150 مليون جنيه وصرف الـ 150 مليون جنيه دول غلط في لعيبة ماينفعش أبداً إن هي تلعب في النادي الإسماعيلي. ده بداية انهيار الإسماعيلي، كل اللي جه بعد كده بيحاول يلحق فيبوظ الدنيا أكتر، فبيحاول يلحق فيبوظ الدنيا أكتر”.
وأكمل:” مش عايز أقول لكم أنا زعلان قد إيه على الإسماعيلي لأن أنا بحب الإسماعيلي جداً وبتشرف طبعاً إن أنا دربت الإسماعيلي في فترتين دايماً بفخر بيهم وبفخر بعلاقتي الطيبة بكل جمهور إسماعيلية”.
و أشار ميدو: “الإسماعيلي لازم يبقى في حل لعودة الإسماعيلي مرة أخرى. الإسماعيلي نزل لكن الإسماعيلي بتاريخه وبجمهوره وبشغف كل الناس اللي بتحبه ومحبي الإسماعيلي يقدر إنه يرجع مرة ثانية، بس لازم عودة الإسماعيلي مرة ثانية يبقى “مشروع دولة”.
وأكد:” الإسماعيلي ماينفعش ينزل وننساه، الإسماعيلي ماينفعش يبقى زي الترسانة، الإسماعيلي ماينفعش يبقى زي الأوليمبي مع الاحترام الكبير للناديين. الإسماعيلي في محافظة كاملة تعداد سكانها يتخطى المليون ونصف مواطن عايشين بيتنفسوا الإسماعيلي’.
وزاد ميدو: “مش عايز أقول لكم التليفونات اللي جت لي وكم الإحباط اللي موجود عند جمهور إسماعيلية من بعد مباراة اليوم. هل هي كانت مفاجأة؟ هي مش مفاجأة، ولكن الناس كانت متوقعة، لكن دايماً المتوقع لما بيبقى واقع الإحساس بالألم بيبقى أكبر بكتير’.
و استأنف:” عشان كده الناس كلها زعلانة، ومش عايز أقول لكم إن مش جمهور إسماعيلية بس اللي زعلان، جمهور كتير في مصر بيحب الإسماعيلي”.
أختتم:” الإسماعيلي مش نادي كان بيتواجد فقط، لا ده نادي بيتواجد وبينافس على القمة وبيقدم لعيبة لمنتخب مصر، ومش بيقدم أي لعيبة، بيقدم لعيبة جامدة قوي تحس كده إن في مغناطيس ما بين الإسماعيلي وما بين اللعيبة الجامدة، لعيبة الكورة اللي بحق وحقيقي. هقعد أقول أسماء كتيرة”.
