وجه الإعلامي أحمد شوبير انتقادات لاذعة لإدارة النادي الأهلي، كاشفاً عن أزمات إدارية ومالية متراكمة تهدد استقرار النادي.
وقال شوبير، خلال تصريحات تليفزيونية عبر برنامج “الناظر”، على قناة” النهار”:” من حوالي شهر قلت لكم إن ريبيرو أخد حكم على النادي الأهلي، والأهلاوية زعلوا لما قلت إن الأهلي بيدفع مرتبات ثلاث مدربين، وكنت بقول إن فيه قصة مع كولر وإن المرتبات بتوصل لعدة شهور”
وأضاف:” وقلت كمان إن ريبيرو أخد حكم، والحكم ما اتقالش تفاصيله وقتها، لكن اتقال إنه حكم موجود، وده اللي أنا فاكره، المبلغ يتخطى المليون دولار، وده حسب ما وصلني من مصدر مطّلع، وده رقم مختلف عن أرقام تانية اتقالت زي 300 أو 400 ألف دولار”.
وواصل شوبير: “وكمان الموضوع مش واقف على ريبيرو لوحده، لكن فيه مساعدين له بيطالبوا بمستحقاتهم، والقضية لسه فيها تفاصيل مالية معقدة وكبيرة”.
وأشار:” الأهلي شايف إن موقفه القانوني سليم، وبيأكد إن كل إجراءاته صحيحة، وفي نفس الوقت فيه أطراف بره النادي شايفة إن الحل الأفضل يكون ودي بدون اللجوء للمحاكم، وفي النهاية، الملف ده لسه مفتوح، وفيه تحركات من كل الأطراف لمحاولة إنهاء الأزمة بشكل نهائي قبل ما يكبر أكتر، خصوصًا مع ضغط تجهيز الموسم الجديد”.
وشدد شوبير:” وبالتالي لابد من الحفاظ على الخصوصية داخل مجلس الإدارة، داخل اجتماعات فرقة الكورة، الاجتماعات مع المدرب”.
وأكمل: “لأنه مش معقول أبداً إنه حضرتك اجتماعات خاصة وحصرية بعد نص ساعة ألاقيها موجودة في كل حتة، استعينوا على قضاء حوائجكم بالكتمان.. هذا الأمر لا يحدث، هذا الأمر لا يحدث للأسف الشديد”
وأوضح شوبير:” فهذا الثلاثي الكبير: محمود الخطيب، ياسين منصور، سيد عبد الحفيظ؛ عليهم أن يعيدوا مرة أخرى السرية والكتمان والحفاظ على الأسرار داخل الأبواب المغلقة”.
وزاد:” كان أبوك يبقى بطل لو أنت عرفت سر من أسرار النادي الأهلي ما تعرفش حاجة خالص، دلوقتي مش محتاج تبقى بطل عشان تجي لك كل أخبار النادي الأهلي بمنتهى البساطة وبمنتهى السلاسة وبمنتهى الهدوء”
و أستطرد سوبير:” وبعدين بقى التهديد (بسلاح) السوشيال ميديا وإنه ده مش عارف يعمل إيه، ده يا ما دقت على الراس طبول.. يا ما دقت على الراس طبول، في ناس الأمر ده مبيفرقش معاها، في ناس بتخاف.. اللي يخاف بقى ميطلعش ميتكلمش ميقولش يعني، فانت لازم تحافظ على أسرار ناديك، أهم ميزة أنت كنت تتميز بيها مش موجودة حالياً”.
وأكد:” أنا بقولك اهو الموسم ده للنسيان، مش مهم عادي جداً، عندك دولاب بطولاتك مليانة مش هيفرق قوي يعني الأمر بسيط، اه يزعل جمهور النادي الأهلي، لكن في النهاية حطه في حجمه الطبيعي هيبقى بسيط، لكن طول ما أنت ماشي بالشكل ده كل سنة وأنت طيب، السنة الجاية هتبقى أصعب واللي بعدها هتبقى أصعب إذا لم تحافظ على أسرارك”.
وأختتم: “إذا لم تسير كما عودتنا دائماً بإنه في ضبط وفي ربط وفي انضباط وفي احترام وفي قوة وفي تدرج واضح؛ رئيس، نائب رئيس، عضو مجلس إدارة أو أمين صندوق، عضو مجلس إدارة، مدير مش عارف إيه، رئيس إيه، مدير إيه.. هكذا”.
