في تطور مفاجئ بملفات القضايا التي تواجه نادي الزمالك وتسببت في عقوبات إيقاف القيد، كشف الإعلامي إبراهيم عبد الجواد عن تفاصيل صادمة بشأن قضية اللاعب عمر فرج، مؤكدًا أن النادي بات مطالبًا بسداد مبلغ مليون و700 ألف دولار، بعد أن كانت هناك فرصة سابقة لإنهاء الملف بدفع 270 ألف دولار فقط.
وقال عبد الجواد، خلال تصريحات تليفزيونية ببرنامج “ملعب أون”، عبر قناة “أون سبورت”:” جمهور الزمالك ربنا يكون في عونه لأنه من ملف إلى ملف، من وقف قيد إلى وقف قيد، من مشكلة إلى مشكلة بعد الانتهاء تمامًا من قصة صلاح مصدق”.
وتابع: “وقصة صلاح مصدق انتهت بعد جولة مكوكية لمسؤولي الزمالك في المغرب وتحديدًا الأستاذ عبد الرحمن إسماعيل، نائب المدير الرياضي ومدير التعاقدات بنادي الزمالك، واللي سافر عشان يخلص قصة صلاح مصدق وبالفعل انتهت بعد مداولات عديدة، عديدة، عنيفة جداً وشديدة جداً مع المحامين والوكلاء وصلاح نفسه”.
وشدد عبد الجواد:” انتهت إلى إنه صلاح ياخد 400 ألف دولار والـ 400 الباقيين يكونوا على أقساط وبالفعل امبارح، ممثلي صلاح مصدق ومحامي صلاح مصدق أرسل الرد الرسمي على الإيميل اللي كان مبعوث من المحكمة الرياضية الدولية “الكاس”.
وواصل:” اللي كان المحكمة الرياضية فيه بتطلب من صلاح مصدق وممثليه إن هم يردوا على ممانعتهم أو عدم ممانعتهم في استئناف الزمالك بإيقاف العقوبة التأديبية وهي وقف القيد بالنسبة للزمالك لفترتين متتاليتين كعقوبة رياضية تأديبية من قبل الاتحاد الدولي “الفيفا” على نادي الزمالك وكان الرد الرسمي الذي تم إرساله بالأمس من صلاح مصدق ومسؤوليه وممثليه إلى المحكمة الرياضية الدولية إن هم غير ممانعين، وإن الزمالك خلص معاهم القصة، وإن هم ما عندهمش أي مشكلة إنه يتم إيقاف ووقف هذه العقوبة فانتهت قصة صلاح مصدق’.
و أشار عبد الجواد: “خلال الـ 48 ساعة اللي جاية في مشاورات ومداولات عديدة وحثيثة من مسؤولي الزمالك للانتهاء من قصة عبد الحميد معالي، ولكن يا دوب هم شغالين في ده، وخلصوا صلاح مصدق ولسه شغالين في عبد الحميد معالي، ظهرت قصة عمر فرج اللي هي كانت واحدة من القضايا اللي على أساسها الفيفا وقع على الزمالك عقوبة تأديبية اللي هي بإيقاف القيد لفترتين متتاليتين’.
و أكمل:” القصة هنا إن حُكم لعمر فرج بمليون و700 ألف دولار طبعاً رقم كبير جداً وهنا بقى أقول لحضراتكم مفاجأة؛ مسؤولي الزمالك جون إدوارد وفريقه كانوا متفقين أصلاً مع عمر فرج إنه ياخد 270 ألف دولار ويخلص القصة ولكن لضيق ذات اليد وما كانش فيه فلوس “.
و أردف عبد الجواد:” فاللي حصل مع صلاح مصدق واللي حصل مع غيره من لاعيبة كتير جداً كان ساعتها ممكن القصص بتاعتهم تنتهي بملاليم مقارنة بالأرقام اللي مطلوبة من الزمالك دلوقتي بس ما كانش فيه فلوس فالملاليم دي أو الآلافات دي، عشان أكون أدق يعني، الآلافات دي بقت ملايين فبدل ما تدفع 270 ألف دولار، أنت مطالب دلوقتي تدفع مليون و700 ألف دولار ”
وزاد: “كمان لما سألنا واستفسرنا: يا جماعة هو الموضوع فيه شكل من أشكال يعني الترصد من عمر لأنه متضايق لأنه عُومل بشكل وحش وعُومل بشكل سيء وكان بيتمرن بشكل منفرد وبتاع؟ فكان التصحيح إنه يا جماعة ده كلام مغلوط لأنه عمر فرج لما جه كان مخلص الدوري في السويد متأخر عن الدوري هنا في مصر، كنا احنا ابتدينا فترة إعداد فعمل جلسة مع يانيك فيريرا، فيانيك فيريرا قال له: أنا ما عنديش أي مشكلة معاك، أنت هتخش الفرقة بس لازم في الأول تتمرن بشكل منفرد تستعيد لياقتك وبعد كده تدخل في الفرقة”.
و أضاف:” فالراجل ساعتها اتمرن بشكل منفرد بعد الاتفاق مع المدير الفني ساعتها هو يانيك فيريرا ولكن لأنه كان مش بيشارك مع الفرقة في التدريبات الجماعية وكمان ما كانش بياخد فلوسه فزهق كده بالبلدي يعني، قال لك: خلاص أنا لا بشارك ولا باخد فلوس فانا أتوكل على الله وساعتها مشي، وحتى بعد ما مشي خلصنا معاه القصة وعملنا معاه ديل بـ 270 ألف دولار بس ما كانش في فلوس متوفرة، وتاني ما عرفناش نخلص معاه القصة ومن هنا كمل بقى هو في مشواره كفسخ التعاقد والمشوار القانوني، وانتهى الموضوع إلى ما هو عليه الآن “.
و أختتم:” هنخلص أو هنحاول نخلص موضوع عبد الحميد معالي، وبعد كده يدخل مسؤولو الزمالك في قصة عمر فرج ده الكلام اللي وصلنا إليه من مصادرنا داخل نادي الزمالك بخصوص الوضع الحالي فيما يخص الملفات وإيقاف القيد”.
