وجّه الكابتن حسين لبيب، رئيس مجلس إدارة نادي الزمالك، رسالة تقدير واعتزاز كبرى لجماهير القلعة البيضاء الوفية، مع اقتراب انطلاق منافسات الموسم الجديد، واصفاً إياهم بالركيزة الأساسية والاعتماد الأول للنادي في كافة الظروف.
وقال لبيب ، في فيديو تم بثه عبر الحساب الرسمي للزمالك على منصة”X”:” لا يخفى على أحد إن اعتمادنا الأوحد والكلي على جماهير نادي الزمالك العظيمة، اللي هي طول عمرها واقفة وراء نادي الزمالك، وطول عمرها هي السند الرئيسي لنادي الزمالك، سواء من ناحية التشجيع، وفي نفس الوقت اللعيب بيبقى حاسس إنه فعلًا وهو بينزل الملعب بيعمل أقصى مجهود ممكن عشان يبسط الملايين من جماهير نادي الزمالك”.
وتابع:” نادي الزمالك يعني يمتلك جماهير في جميع أنحاء العالم، في مصر، في البلاد العربية، في البلاد الأوروبية، وفي أمريكا. الجماهير دي هي أعظم شيء في نادي الزمالك”.
و أضاف لبيب: “إحنا جماهيرنا طول عمرها جماهير بتحث اللاعبين على بذل أقصى مجهود، يمكن شفنا كتير جدًا من مباريات ما حصلش فيها توفيق لنادي الزمالك، وكان الجمهور بيحايل اللاعبين. الجمهور بتاعنا عمره ما كان بيسب اللاعبين أو بيشتم اللاعبين، جمهورنا أعظم جمهور في الكون”.
وشدد:” أنا بفتخر بجد وبقدر إنه عمل السنة دي بالذات ملحمة. بتحس إن جمهور نادي الزمالك عيلة واحدة، الناس كلها مع بعض، والناس كلها يعني بتتفانى في حب نادي الزمالك. ده أعظم حاجة، الواحد لما يكون من نادي الزمالك فخر لأي مواطن، ويبقى فخور فعلًا إنه ينتمي لنادي الزمالك”
وواصل لبيب:” لما تقعد في الملعب التسعين دقيقة، وتشوف حماس الجماهير وتشوف الجمهور ده بيعمل إيه، ما تعرفش الظروف اللي كل واحد في بيته، اللي مريض والزعلان واللي متضايق، بينسى كل حاجة وييجي يشجع نادي الزمالك”
وأشار:” ده الواحد يعني بيبقى أكبر حافز للاعبين، وده اللي فعلًا حقق النجاح، الحمد لله، كواليس القرار ده، إحنا القرارات بتبقى كلها عبارة عن إننا بنتناقش مع بعض كمجموعة مجلس إدارة، ولقينا إن إحنا نفسنا نعمل حاجة للجمهور العظيم ده. حسينا إن الاقتراح ده لو تم تنفيذه، والحمد لله إن إحنا نفذناه، هيبقى ده دافع كويس جدًا سواء للاعبين أو للجمهور”
و أردف لبيب:” إحنا حسين بالجمهور، وده يعني امتنان وشكر للجمهور ده، جمهور نادي الزمالك العظيم، فأنا شايف بصراحة التواجد والأفكار العظيمة اللي اتحطت من الجمهور السنة دي في الدخلات اللي عملوها حاجة عظيمة جدًا. لو كلنا هنتذكر، ما شفناش في العالم وفي مباريات كرة القدم وفي كل الاستادات حد عامل باسم نادي الزمالك على آلاف في الاستاد بالكامل، بالكامل يا جماعة”.
وزاد:” الواحد برضه بيسعد قبل المباراة، يعني أنت فخور إن أنت عندك هذا الجمهور. بجد أنا فخور إن عندنا هذا الجمهور، بالإمكانيات اللي هي، يعني حقيقةً ما طلبوا مننا حاجة ولا أي شيء، ولا كنا نعرف هيعملوا إيه، ويكفينا فخرًا فعلًا إن الناس تسعين دقيقة تشجع من قلبها”.
و أستطرد لبيب:” اللاعب مهما كان وهو جوه الملعب لازم بيتنقل له هذا الإحساس. فبرضه برجع وأقول جمهور نادي الزمالك هو أعظم جمهور في كل الدنيا”.
و أكد:” إحنا كان هدفنا، الحمد لله، إن إحنا ندخل إفريقيا، فحاليًا الهدف تحقّق. عايزين ونرجو من الله إن لو وفقنا، إحنا البداية صعبة، بس ظروف النادي صعبة جدًا جدًا، وظروفنا صعبة جدًا جداً، بتكاتف الجميع وجمهورنا ورانا وأمامنا، إن شاء الله هنقدر نحقق كل اللي بتنطمع فيه”.
و استأنف لبيب: “خلي السيزون يبتدي ونشوف إن شاء الله إيه اللي هيحصل، إنما نتعشم خيرًا، وكلنا الحمد لله واثقين في لعيبتنا، واثقين في الجهاز الفني وكابتن معتمد جمال”.
و أختتم:” وإن شاء الله نقدر نحقق كل طموح جمهور نادي الزمالك وطموح مجلس إدارة نادي الزمالك، ولسه الحدوتة مكملة يا جماعة”.
