أكد الدكتور حسام المندوه، أمين صندوق نادي الزمالك، أن القضايا الدولية تظل هي التحدي الأكبر الذي واجه مجلس الإدارة منذ تولي المسؤولية، مشددًا على أن المجلس ماضٍ بكل حزم في طريق إصلاح هذه الملفات وعدم تركها حتى يتم حلها جذريًا.
وقال المندوة في تصريحات عبر راديو صوت الزمالك ردا على سؤال: “الناس بتقول لحضرتك اه المجلس جيه فعلا فك القيد مرة واثنين في قضايا مكنتش تخصه خالص.. لكن اتصنع أكثر من 20 قضية تخصك ودي فواتير هذا الوقت علشان كده دي المشكلة والإحباط اللي عند الجمهور، لان الجمهور كان طمعان أوي أوي في الأربع سنين بتوع المجلس دول السكه متروحش لعشرين قضية والارقام دي وتقل،:” أنا متفق معاك ومع الجمهور وده كلامنا كلنا في المجلس أن أكبر مشكلة حصلت هي القضايا الدولية، علشان كده بنقول أننا مش هنسيبها غير لما نصلحها”.
و أشار: “الحلول أننا نوفر فلوس نخلص من القديم والإدارة الجديدة للكرة في الزمالك يكون عندها القدرة وده مهم جدا جدا”.
و أجاب المندوة ردا على سؤال نقدر نقول موعد الإعلان امتى عن المدير الرياضي الجديد في الزمالك؟:” الملف ده مع كابتن حسين لبيب وهو اللي يقدر يتكلم فيه .. مش عايز نخوض فيه”.
وتابع:” ملف الكرة حاليا ماشي كويس وفي كابتن عبدالناصر محمد كويس جدا وكابتن حسين السيد بيقوم بمجهودات كبيرة ومطلع عينا وإحنا كلنا في ظهره، بس احنا عايزين اللي يجيي يستقر ويبقى أنت عارف مدخلاتك ايه ”
وشدد المندوة: “لازم نتعب في الملف ده جداً لأن في الاخر الملف ده بيضرب في وشنا إحنا، فاللي هيجي لازم نقوله بعض المشاكل الموجودة أو اللي هتظهر في وجودك لازم يكون عندنا حنكة نحل بيها المشاكل دي”.
وزاد:” متصدرش مشكله لنادي الزمالك وتقول إنها مشكلة مالياً فقط .. لا لا في أمور كتيرة ينفع نحل بيها غير الأموال وضربت مثل بموضوع سيف الدين الجزيري واللي حصل معاه مؤخرا “.
وأختتم:” في الاخر اللي جاي مش هيبقى وحش لكن مش سهل أبدا محتاج ناس عندها قدرة على التحدي”.
