أكد الإعلامي أحمد شوبير وصول العلاقة بين الزمالك واللاعب البرازيلي بيزيرا لطريق مسدود، مشيراً إلى أن النادي بدأ تجهيز شكوى رسمية للفيفا بتهمة الانقطاع عن التدريبات رغم سداد مستحقاته.
وقال شوبير، خلال تصريحات تليفزيونية ببرنامج “الناظر مع شوبير”، عبر قناة “النهار”:” الزمالك فاض به الكيل وخلصت الحكايه
المسؤولين في الزمالك قالوا إحنا هنطول بالنا على اللاعب وهنتعامل بهدوء شديد، لكن لما لقوا بيزيرا لسه مكمل في العناد ومستمر في غيابه، التحرك بدأ فوراً بشكل رسمي”.
و أضاف: “إدارة الزمالك بدأت بالفعل تجهيز شكوى رسمية وموسعة ضد بيزيرا لتقديمها للفيفا، الزمالك متأكد بنسبة 100% إن اللاعب موجود حالياً في دبي”.
وتابع شوبير:” طب الزمالك بيتعامل إزاي؟ الزمالك لحد اللحظة دي بيتعامل قانونياً إن بيزيرا لاعب في النادي ومقيد في صفوفه.. وعشان النادي يضمن حقه ويقفل الباب أمام أي ثغرة، الزمالك حوّل للاعب كل مستحقاته المالية بالمليم.. يعني الموقف القانوني للزمالك سليم تماماً”.
و شدد: “شكوى الزمالك اللي هتتقدم للفيفا بتتضمن إيه؟ بتتضمن إثبات كامل بـ انقطاع اللاعب وغيابه عن التدريبات الجماعية بدون أي إذن، والزمالك دلوقتي مستني حاجة واحدة بس: ظهور اللاعب في أهلي دبي والإعلان الرسمي عن الصفقة”.
وواصل شوبير:” نصدر مسؤول داخل نادي الزمالك أكد لي إن الشكوى مش هتكون ضد اللاعب وبس، الزمالك هيختصم كمان النادي اللي هينضم له بيزيرا، موقف الزمالك قوي جداً “.
واختتم: “لكن قانوناً ومن واقع اللوائح.. من حق اللاعب إنه يلعب وياخد بطاقة دولية مؤقتة بداعي ‘حق العمل’، والقضية هتروح في الفيفا وهتاخد وقتها.. لكن في النهاية، اللاعب مهدد بقوة إنه ياخد عقوبة إيقاف من 3 لـ 4 أشهر، رغم إننا كلنا عارفين إن الفيفا في أغلب الأوقات بتقف في صف اللاعبين.”.
