كشف الإعلامي كريم حسن شحاتة، أن مجلس إدارة نادي الزمالك قد اتخذ قراراً حاسماً بفتح تحقيق عاجل وموسع في ملف القضايا الخاصة بالاتحاد الدولي لكرة القدم “فيفا”، لمعرفة الأسباب التي أدت إلى وصول الأمور لهذا الشكل المتأزم.
وقال شحاته، خلال تصريحات تليفزيونية عبر قناة” الحياة”:” مجلس إدارة نادي الزمالك قرر فتح التحقيق في ملف القضايا الخاصة بالفيفا، وإزاي وصلت الأمور للشكل ده، وبدأ بالفعل التحقيق”.
و أضاف: “الزمالك عايز يحقق مع المسؤولين عن قطاع الكرة السابقين، اللي هما جون إدوارد، وكمان حمزة عبدالوهاب اللي كان ماسك منصب مدير شؤون اللاعبين في نادي الزمالك”.
وواصل شحاته:” التحقيق هدفه إنهم يشوفوا الأخطاء اللي حصلت في ملفات اللاعبين اللي مشيوا، والملفات اللي كانت موجودة خلال الفترة اللي فاتت، ويحاسبوا المسؤولين عنها”.
و أكمل: “كابتن أحمد سليمان، عضو مجلس إدارة نادي الزمالك، كان تقدم بمذكرة عشان يتم فحص الـ18 قضية اللي تسببت في إيقاف القيد على الزمالك، ومعرفة إزاي القضايا دي وصلت للمرحلة دي كان في مسؤولين سابقين وكمان اللي قبلهم كله هيتشاف معاهم الموضوع ده حصل إزاي”.
وشدد شحاتة:” فيه كارثة في موضوع عمر فرج، اللاعب الفلسطيني، الزمالك دفع فيه فلوس كتير جدًا، ودفع لناديه فلوس كتير جدًا تقترب من حوالي 3 مليون دولار، والزمالك ما استفادش منه خالص، واللاعب ملعبش وطلع إعارة ورجع الزمالك”.
و أشار:” الزمالك دفع فلوس للاعب، مش عارف مليون و600 ولا مليون و500، ودفع كمان فلوس لناديه في السويد، يعني أرقام كبيرة جدًا وأخطاء فظيعة من المسؤولين عن الكرة في الزمالك في بعض الملفات”.
و أنهى:” فهيتم التحقيق في الملفات دي، وبيتم التحقيق مع جون إدوارد وتم التحقيق مع حمزة عبدالوهاب، والموضوع خلاص اتحرك، والشؤون القانونية في نادي الزمالك فتحت التحقيق عشان تعرف أسباب القضايا والمشاكل اللي حصلت خلال الفترة اللي فاتت”.
