أكد الإعلامي أحمد شوبير، أن محمد الشناوي، حارس مرمى الأهلي ومنتخب مصر، يتدرب بصورة طبيعية مع الفريق منذ عودته، مشددًا على أن حالته جيدة ولا يعاني من الإصابة التي تم تشخيصها له في وقت سابق.
وقال شوبير عبر إذاعة «أون سبورت»: «محمد الشناوي بيتمرن مع الفريق من ساعة ما رجعوا.. إيه اللي زعل في هذا الأمر؟ هل ده بقى يعني أنا كده بعمل خطأ جسيم؟»
وأضاف: «الراجل اتشخّص إنه عنده إصابة، طلع لأ.. معندوش الإصابة دي، والراجل بيتمرن والدنيا تمام ومفيش مشاكل خالص».
وتابع: «أنا مش فاهم إيه الحساسية البالغة دي؟ يعني إيه المبالغة في الحساسية في حسابات ومش عارف.. ده فين؟ وده منين؟ وده ليه؟».
وشدد شوبير على تمسكه بصحة المعلومة التي نقلها بشأن حالة الشناوي، قائلًا: «أنا متعودتش أقول خبر غلط، وأنتم عارفين لما بقول خبر غلط بقول أنا آسف، أنا قلت خبر غلط».
وأوضح: «أنا بقول لك خبر وبقول لك والله العظيم خبري صحيح بنسبة 1000%، مع كل احترامي لكل الزملاء اللي بيقولوا غير كده، هم أحرار ولهم كل الحرية».
واختتم شوبير حديثه بالتأكيد على أن سلامة الشناوي أمر يدعو للفرحة، قائلًا: «الراجل سليم والحمد لله بيتمرن.. فأنت تفرح! لما تروح تزور واحد مريض فتلاقيه سليم بتفرح ولا بتزعل؟ الحمد لله والشكر لله الراجل سليم، هل في هنا حاجة غلط؟ سبحانك يا رب!»
