وجه الإعلامي إبراهيم عبد الجواد، رسالة نارية لناصر منسي، مهاجم نادي الزمالك، بسبب تصرفه بعد مباراة بتروجيت الأخيرة في الدوري.
وقال عبد الجواد، خلال تصريحات تليفزيونية ببرنامج “ملعب أون”، عبر قناة “أون سبورت”:” في لقطتين بعد مباراة الزمالك وبتروجيت، واحدة بتبين لك قيمة اللعيب الكبير، وواحدة ما كنتش أتمنى إن هي تطلع من لعيب كبير زي ناصر منسي”.
و أكمل:” ناصر منسي لقطة ما تصحش، ولا تليق، وما تطلعش منك يا ناصر، إن جمهور الزمالك -وما أدراك ما جمهور الزمالك العظيم- يكون بينادي على لعيبته فاللعيبة كلها تروح، ناصر منسي زي ما أنتم شايفينه كده تحت خالص هتلاقي بص كل اللعيبة رايحين، لا ناصر منسي رقم تسعة واقف جنب لوحة الإعلانات بياخد بعضه وبيخرج بره الملعب، لا تليق ولا تصح ولاتنفع يا ناصر ومالهاش مبرر ومالهاش عذر”
و أشار عبد الجواد:” لعيبتك رايحة كابتن الفريق رايح الجمهور بينادي، الجمهور ده هو اللي ربنا سبحانه وتعالى جعله سبب إن الفرقة دي أصلاً واقفة على رجليها، والجمهور ده هو اللي ربنا سبحانه وتعالى جعله سبب إنه يوقفك أنت أصلاً على رجليك يا ناصر، فما كان يجب ولا يصح ولا يعني تصرف موفق منك يا ناصر إن أنت تاخد بعضك، وتمشي”.
و أتم: “جمهور الزمالك محتاج منك إن أنت تعبر بقى و تعتذر لهم ده في الملعب بمجهودك بأدائك، اللي بالتأكيد أنت قبل أي حد شايف إنه بعيد تماماً عن اللي كان موجود عليه السنة اللي فاتت، الكلام ده دايماً بقولها من زمان جداً النقد ده نقد محب الواحد يحب دايماً النجوم والشخصيات الكبيرة تبقى دايماً تصرفاتها على نفس القدر قدر كبير، الواحد بيقول الكلام ده ناصر عشان هو بيحبك”.
