كشف الإعلامي هاني حتحوت، عن تفاصيل مثيرة وكواليس مشتعلة داخل معسكر نادي الزمالك، بالتزامن مع الاستعدادات للمواجهة المرتقبة في بطولة الدوري أمام فريق “أبو قير للأسمدة”.
وأوضح حتحوت من خلال برنامجه” مودرن سبورتس”:” بينما يستعد نادي الزمالك للمواجهة المقبلة في الدوري قدام أبو قير للأسمدة، النهارده حصلت زيارة من وفد من مجلس إدارة نادي الزمالك، برئاسة الكابتن حسين لبيب، ومعاه نائبه الكابتن هشام نصر، ومعاهم المشرف على فريق الكرة من مجلس الإدارة، الكابتن حسين السيد”.
و اضاف:” رايحين علشان يشدوا من أزر اللعيبة ويقولوا لهم: «استحملونا شوية في المرحلة دي، وإن الفلوس جاية جاية، لكن بنطلب منكم الصبر»”.
وتابع حتحوت: “وهنا جه رد فعل لاعيبة الزمالك، كلف لاعبو الزمالك قائدي الفريق، الونش وعمر جابر، إنهم هما اللي يقابلوا الوفد الإداري الكبير من الزمالك، وقالوا: «إحنا مش عايزين نقابل أي مسؤول دلوقتي. ما دام مش جايين لنا بخبر إن الفلوس جاهزة، يبقى روحوا إنتوا قابلوهم. بلاش القعدة، مش هتبقى حلوة، والنقاش مش هيبقى مجدي، وربما تخرج كلمة من هنا أو رد فعل من هنا، لأنه حصلنا على كتير من الوعود في الفترة اللي فاتت. فاطلعوا إنتوا»”.
وواصل:” فطلع كابتن الزمالك، عمر جابر والونش، واتكلموا نيابة عن باقي اللعيبة، بعد رفض اللعيبة حضور الاجتماع، والحقيقة إن مسؤولي الزمالك، بقيادة الكابتن حسين لبيب، كانوا رايحين علشان يهدوا ويوعدوا، ويأكدوا من جديد إن الفلوس جاية جاية”
و أكمل حتحوت:” الكابتن حسين لبيب، من جهته، قرر إنه يعقد جلسة في الساعات الحالية، يمكن علشان يبحث من جديد عن حلول سريعة لصرف مستحقات لاعيبة الزمالك’.
وأشار:” اللعيبة قايمين بأكمل ما عليهم، صابرين على الفلوس المتأخرة، وما بدأوش الموسم بمستحقات الموسم الجديد، وشغالين، وراهم جمهور كبير، وعندهم تيشيرت بيلعبوا عشانه”.
وأنهى: “الكابتن حسين لبيب عايز يلاقي حل من رجال الأعمال، ومن موارد إضافية تدخل للقلعة البيضاء، علشان يوصل لحل لمستحقات لاعيبة الزمالك في المرحلة دي”.
