علّق الإعلامي سيف زاهر، عبر شاشة قناة «أون سبورت»، على الجدل الدائر حول تولي المدرب الحسين عموتة مسؤولية تدريب النادي الأهلي، واحتياجات الفريق، متطرقاً في الوقت ذاته إلى الأزمة المثارة حول تصريحات اللاعب عمر كمال عبد الواحد.
وقال زاهر، خلال تصريحات تليفزيونية عبر “أون سبورت “:” ناس كتيرة بتتكلم على الحسين عموتة، وناس كتيرة بتتكلم على إدارة الأهلي، إن عموتة هيقدر ولا مش هيقدر ناس بتقولك عموتة عصبي، عموتة هادي، أنا قلت وجهة نظري في القصة دي ووجهت له رسالة قبل كده”
و أضاف'”أنا يا عم الحاج بقولك أهو، من حد متابع جيد بقاله سنين للدوري المصري، ومتابع جيد للاعبين المصريين: طالما في الحدود، خليك عصبي، اللاعب المصري مش بتاع المدرب الهادي طبعًا، دون خروج عن النص”
وأردف زاهر:” أنا بتكلم عن العصبية اللي هو شد وحماس وقصة والموضوع والحكاية والرواية، عشان هنا بقى الأمور تبقى واضحة. فإنت على عصبيتك، خليك على عصبيتك”.
وتابع:” كابتن أحمد حسن إمبارح كان مستضيف عمر كمال عبد الواحد، عمر كمال عبد الواحد إمبارح شرح شوية حاجات كده، أنا مش جايب في تفاصيلها، ولكن الناس أخدت القصة وقالت: «أهو، أدي عموتة وأدي القصة وبتاع».
وواصل زاهر:” أنا بدي لعمر كمال عبد الواحد نصيحة زي أخويا الصغير بالظبط: أما تخرج من مكان زي النادي الأهلي، أهم حاجة تعملها إن الكواليس اللي كانت جوه متحكيهاش، ودي هنا واجبة على عمر كمال عبد الواحد، الاعتذار”
وشدد: “أما تكون في بيتك، النادي الأهلي، وتقعد فيه فترة ويحصل أحداث، بحلوها بوحشها بمرها، لازم تتعلم. إنت لاعب كبير وخبرة كبيرة وابن نجم كبير جدًا جدًا، كابتن كمال، ولاعب دولي، ولسه قدامك المشوار، وإن شاء الله باذن الله ترجع برضه تاني وتروح تكسر الدنيا وتتألق وتعمل كل حاجة”.
وأكمل زاهر:” بس هنا دي نصيحتي: أول حاجة، جمهور الأهلي مبيحبش اللقطة دي، مبيحبش إن أنا أطلع وأقوم حاطط الورق كله، لأن في كواليس ناس كتير حلوة ووحشة، لو كل واحد هيحكي الكواليس الوحشة اللي عنده، الدنيا مش هتمشي، ومش هتفضل المنظومة كبيرة كبيرة”.
وشدد:” فإنت النهارده طالع من بيتك، بتحافظ عليه، فدايمًا خلي الكواليس اللي جواك جواك، مواقف كتيرة قوي حصلت، ودايمًا والله بقول لنفسي كده: أنا قعدت على ترابيزات بفضل الله كتير، مجالس إدارة أندية ومجالس إدارة اتحادات وحاجات كتيرة جدًا”.
وزاد زاهر:” بقول بعد ما أخرج من الجلسة: اللي اتقال مات على العمر كله. أرجع وأحكي وأقول وأعمل، عمر ده ما هيعمل نجاح، عمر ده ما هينجح، فدي كانت نصيحتي بس لعمر في القصة دي”.
و أتم:” الناس عايزة تحكم على عموتة، والناس بتقول لك إن إدارة النادي الأهلي محتاجة صفقات، الأهلي محتاج صفقات، الناس بس ناسية نقطة مهمة جدًا، ناسية إن فيه عدد كبير من اللاعبين في النادي الأهلي لسه ما لعبوش حتى الآن، لسه ما شافوش الملعب”.
