كشف عبدالناصر محمد، المدير الفني لنادي القناة، أنه كان يشعر بأن فريقه الأقرب للفوز على الأهلي، مشيدًا بروح لاعبيه وما قدموه خلال اللقاء.
وبدأ الحوار بسؤال إبراهيم عبدالجواد عبر أون سبورت: «اقولك النهارده مبروك ولا هردلك؟!» ليرد مدرب القناة: «لا هردلك بصراحه .. كنت حاسس أننا الأقرب النهارده».
وأضاف عبدالناصر محمد: «لكن بجد اللعيبه كانت رجالة اوي النهارده وبشكرهم كلهم».
كواليس تحفيز لاعبي القناة قبل مواجهة الأهلي
وقال عن حديثه مع اللاعبين قبل المباراة: «أنا قبل الماتش قولتلهم عايزكم تلعبوا بكل قوة حتى لو خسرتوا تطلعوا رجاله من الملعب».
وتابع: «انتوا كسبتوا سيراميكا كليوباترا و حتى الخسارة من بيراميدز كانت بالعافية»، مضيفًا: «انتوا مفيش فرق بينكم وبين اي فريق .. رغم اني بقولهم كده وانا معايا 17 لاعب من الدرجه الثانيه اللي كانوا معايا».
ورد إبراهيم عبدالجواد: «درجه ثانية ايه يا كابتن .. دي لعيبة جامدة جدا وعملوا ماتش جامد اوي».
وعلق مدرب القناة: «ده حقيقة والله اللعيبه كانت رجالة اوي كلهم وكلها توفيق من عند ربنا النهارده».
وكشف عن طريقته في تهدئة اللاعبين وتحفيزهم: «أنا حاولت احفز اللعيبه كويس وحتى كنت بحاول اسقف للعيبه لما تغلط علشان احاول انقل هدوئي ليهم حتى بحاول اضحك واهزر معاهم علشان محدش يتوتر أو انقل ليهم اي حاجه سلبيه».
وأضاف: «وطبيعي يكون الأهلي هو اللي مشدود لانه بعد ما أتقدم كان متأخر واحنا اللي ماسكين كورة»، واختتم: «بشكر اللعيبه والجهاز الفني والإدارة وربنا يكرمنا في القادم».
