هتروح من ربنا فين ؟ .. هجوم ضاري من إبراهيم حسن على حكام الأهلي والإعلام ويطالب بإعاده المباراه

فتح إبراهيم حسن عضو الجهاز الفني بالفريق الأول للنادي المصري النار على حكم الرايه وحكم الڤار ، مشيراً الى وجوب إعاده المباراه بسبب الأخطاء التحكيميه .

وكان الحكم المساعد قد الغى هدف التعادل للنادي المصري في الوقت القاتل ، فضلاً عن عدم تواجد صوره للڤار للهدف مما سبب حاله من الجدل بعد الغاءه

وقال إبراهيم : بقول للحكم المساعد هتروح فين من ربنا ، زي ما الاهلي والزمالك عاوزين ياخدوا الدوري المصري كمان ابسط حقوقه انه يقعد في الدوري ” .

وواصل :”لاعب الأهلي هو اللي لمس الكوره والكوره هدف صحيح ، هات الكباتن الكبار في الدوري المصري والسوداني والبرتغالي ، لو واقف بشرب شاي في الجول والكوره جاتلي من المدافع متبقاش أوفسايد “.

وأضاف :”الحكام بتاخد قرارت مقدم على قوانين الموسم الجديد عشان بيحوشوا ، هو انتوا بتقسطوا ؟ هو انت بتشتري شاليه ؟ اتقوا ربنا بقا “.

وأردف :”احنا بنشتغل ليل ونهار وبنشيل بلاوي زرقا ملناش دعوه بيها ، يبقى لما اتعب واجتهد اديني حقي ، وبعدين ضربه جزاء اموتو دي مش ضربه جزاء ؟ لو دي للنادي الأهلي واتحسبت ولا واحد فينا هيفتح بوقه ! “.

وعن ركله جزاء الأهلي قال :”وضربه جزاء النادي الاهلي دي بينالتي ؟ ده كريم مش شايف اصلا وحسام جاي من اخر الدنيا واخد القرار انه ياخد ضربه جزاء واتحسبتله ضربه جزاء”.

وأستطرد :”انا شايف الجول اللي اتلغى ده فضيحه ، انا بقا حقي فين لما اتحولوا تحقيق ، افرض النادي المصري بتاريخه ده كله نزل ، لو الناس في مصر عندهم ضمير ، الماتش ده يتعاد ، وانا وحسام واللعيبه دي قادرين لما يتعاد نكسب ، الاهلي مرضيش يلعب بالناشئين و كان مقلق مننا طول الماتش ” .

وعن مزاعم لعب الأهلي بالناشئين قال :”بعض الاعلاميين بيسوقوا ان ناشئين النادي الاهلي لعبوا الماتش اللي فات ، اللعيبه اللي لعبت مع الاهلي و الزمالك حاليا عدوا فوق السن يعني بيتقيدوا فريق اول ، الي لعبوا ماتش الاتحاد فوق السن ومواليد ٢٠٠٠ و ٩٩ ” .

وأتم :”عشان النادي الاهلي يعلم قوه حسام حسن وقوه المصري ، ولا واحد قدر يلعب بالي لعبوا قصاد الاتحاد ، حط تحت دي ١٠٠ خط انهم كانوا قلقانين مني ، النادي المصري عملوا ماتش من احسن الماتشات واسأل جمهور الاهلي اللي بيزوم لما لقى الفرقه بتلعب كده”.