وجه الإعلامي أحمد شوبير نقد لاذع للاعبي الأهلي وأبنائه السابقين بسبب مواقفهم الأخيره تجاه الفريق ومجلس الإداره .
وقال شوبير :في أمر أصبح مستفز الحقيقه من بعض أبناء النادي الاهلي ، يا اخي مش لازم عشان انت ابن الاهلي تشتغل في قطاع الناشئين او تبقى عضو مجلس إداره او عضو فالجهاز الفني “.
وأضاف :” الحياه بتمشي وبتتطور والعجله بتدور ودي سُنه الحياه ، ابو رجيله صانع امجاد الزمالك ابتعد عن الصوره وكل ما تكلمه عن الزمالك يقول اشعار كأنه بايت في الزمالك”.
وواصل :”لكن مش عشان انت مش عضو مجلس إدارة او اترفضت في قطاع الناشئين تطلع تقطع في الفريق وفي الاداره ، وانك تغير انتمائك عشان اترفضت ده مش انتماء ده تمثيل ، انا مثلا اترفضت اني اشتغل مدرب في الاهلي وعادي جدا ربنا فتحلي مجالات تانيه ولسه عندي انتماء للاهلي “.
وأردف :”في ناس من اللي بيتكلموا دول خسروا اتنين وتلاته دوري ورا بعض و خسروا اتنين وتلاته افريقيا ورا بعض ، وبعدين انت مش بتخسر قدام نادي صغير انت خسرت قدام نادي كبير زي الزمالك”.
وأتم :”الانديه هي اللي ليها الفضل عليك وهي اللي غيرت دنيتك وغيرت حياتك وصنعت اسمك ، لكن انقلب ١٨٠ درجه كده انا مش عارف احللها ، اتمنى ان الناس دي تعيد حساباتها “.
