فتح مدرب المنتخب الوطني روي فيتوريا النار على المتسببين في أزمه اللاعبين الدوليين بين الزمالك واتحاد الكره بسبب مباراه ايليكت التشادي ، كما أشاد بشكل خاص بنجم الوسط محمود حماده بعد ظهوره الرائع خلال وديه النيجر .
وقال فيتوريا :”نجحنا النهارده في هدفنا من المباراه ، النهارده كانت انطلاقه تحدي جديد للمدرب واللاعبين ، الاداء مكنش المرجو ١٠٠٪ ولكنه كان جيد جداً”.
وأكمل :”احنا لاعبنا فريق بيحاول يتكتل دفاعيا خاصه في الجزء الاخير من الملعب ، ورد في فعلنا في استرداد الكره كان سريع ، واللاعبين كانوا مركزين طول المباراه وكانوا بيحاولوا يبحثوا عن المساحات خاصه على الاطراف “.
وواصل :”استطعنا ان نظهر على أرض الملعب افكار من اللي اتدربنا عليها في الخمس أيام الماضيه ، اللاعبين أدوا بشكل جيد وضغطنا على الخصم و خلينا معندهمش اي فرص تقريباً في المباراه “.
وأردف :”الملعب مكنش مرشوش كويس في الشوط الاول ودي عطلت من سرعه الكوره وخلى الاعبين ياخدوا ثانيه زياده لان الكوره بتوصل بطيئه للاعب ، محتاجين نزود اكتر من التسديدات على المرمى و اعتقد مفيش نقاط سلبيه في المباراه”.
وإستطرد :”الحكم ساعدنا اليوم ؟ لا لم يحدث كنا الافضل ومكتسحين اللقاء ، الحكم ساعدنا في ايه ؟ قراراته كلها كانت سليمه ولو ابتدينا نتكلم على التحكيم يبقى احنا بنحول اهتمامنا من المباراه نفسها لحاجه تانيه “.
وعن أزمه اللاعبين الدوليين قال :”اللاعبين اللي سمحنا ليهم انهم يخرجوا من المعسكر للانديه ( الونش وزيزو ) هيرجعوا تاني بعد مباراتهم لمعسكر المنتخب ، بصرف النظر اللعيبه تروح وترجع ده مش مشكله ، المشكله ان الفريق بيلعب ماتش في توقف الفيفا وده مستحيل كان المفروض يتم في الوقت ده “.
وواصل :”احنا كمدربين ولاعبين بنحاول نحل مشاكل مش بتاعتنا ومش بسببنا ، انا مدرب ل١٢٠ مليون ومدرب ل١٨ فريق بيلعب في الممتاز ، الي بيحصل دلوقت ده حاجه عمرها ما حصلت قبل كده ومينفعش تحصل بعد كده ، من ٢٠ سنه بشتغل في الرياضه وعمر ما حصل ان اثناء توقف دولي يحصل مباراه لفريق وتبقى دوليه كمان “.
وأكمل :”اللاعبين هيروحوا ويرجعوا بعد يومين لكن انا عندي مجموعه جيده جدا من اللاعبين وكلهم جيدين وأدوا في التدريبات بصوره جيده جدا “.
وأضاف :”في لاعبين وصلوا للمنتخب منهكين وعندهم حمل بدني زياده ومحتاجين للراحه ، احنا حالياً بندرس ده وازاي نتغلب عليه “.
وأتم :”ازاي لعيبه زي محمود حماده ولاعبين تانيين مخدوش اهتمام وتطوير اكتر من ده ؟ لو بصينا للمباراه هنلاقي حماده لعب بكفاءه عاليه وكأنه لعب ٢٠ او ٣٠ مباراه دوليه مع المنتخب ، انا بتكلم عليه لانه يستحق وده استثناء اني اتكلم عن لاعب بعينه لانها اول مباراه ليه وهو ٢٨ سنه و لعب مباراه جيده جدا”.
