كشف أمير مرتضى منصور المشرف العام على الكره بنادي الزمالك عن قيمه صفقه إنتقال إبراهيما نداي من نادي لوزيرن السويسري لنادي الزمالك ، كما وجه رساله لاحمد سيد زيزو بعد تجديد تعاقده مع الفريق ، كما وجه رساله لجمهور الزمالك بشأن الصفقات الجديده.
وقال أمير :” احنا وعدنا ان احنا هنشتغل على كل الملفات وشغالين نحل كل المشاكل اللي كانت موجوده ، خلصنا ٩٠ ٪ من مشاكل الزمالك سواء وقف القيد او تعديل عقود او لعيبه عندهم مشاكل في العقود ”
وواصل :”انا اكتر واحد فرحان بالمستوى اللي زيزو وصله ، انا فرحان بالمشروع بتاع زيزو وهو يستحق المكانه اللي وصلها “.
وأضاف :”احنا هنحتفظ بزيزو بعقد يمتد لمده ٣ سنين ومن غير شرط جزائي وده كان هدفنا ، والد زيزو قال ان احنا حطينا الشرط الجزائي بسبب عدم وجود استقرار “.
وأكمل :”انا بشكر المستشار مرتضى على الصلاحيات اللي هو مديهالي وعلى الدعم الغير مسبوق ، بشكر زيزو على رغبته في البقاء رغم وجود عروض من اوروبا ومن الخليج ولكنه شاف فضل الزمالك عليه وقدره ، زيزو مرتبط بالزمالك واحنا كمان مرتبطين بيه “.
وإستطرد :”بشكر جمهور الزمالك على الوعي وعلى الدعم ، انا قولت اننا مش هنعمل صفقات جماهيريه احنا هنعمل الصفقات اللي محتاجينها “.
وأردف :”لو في صفقات جماهيريه في الدوري المصري هتبقى لعيبه الزمالك لانهم ابطال الدوري مش حد تاني “.
وشدد :”مينغعش يبقى فيه صفحه عليها ٢٠٠٠ ولا ٣٠٠٠ واحد تقول مين يجي ومين يمشي ، احنا الناس مرجعتناش انا ومرتضى عشان نمشي ورا الصفحات “.
وأتم :”مش طبيعي ان اللعيب اول ما يجي ومن غير ما يلعب اقول اصله فاشل وهيفشل ، اصله فري ، ده مش طبيعي ومش منطقي ، ابراهيما نداي مش لاعب فري ولكنه تعاقد من نادي لوزيرن السويسري ب٨٥٠ الف يورو ، أحسن صفقات اتعملت في تاريخ الزمالك اتعملت في اخر ٥ او ٦ سنين”.
