مدير التعاقدات بالمقاولون العرب يحسم الجدل حول قانونيه موقف الزمالك من قيد سيف الجزيري !!

كشف رامي ربيع مدير التعاقدات السابق بالمقاولون العرب وقت تعاقد سيف الجزيري عن كواليس تعاقد الزمالك مع اللاعب ومدى قانونيه موقف النادي من قيده .

وقال ربيع :”لو الجزيري انتقل في صفقه انتقال حر هنبقى احنا في مشكله و الزمالك في مشكله و اتحاد الكوره في مشكله “.

وواصل :”لو انتقال حر يبقى ال١٢ مليون و ال٨ مليون اعاره اتسجلوا في الموازنه على اساس ايه ؟”.

وأكمل :”لو انتقال حر ازاي الزمالك سجل اللاعب وهو موقوف عن القيد ومخالف للوائح ؟ ، اتحاد الكره اللي عنده خطاب ايقاف قيد للزمالك سجل اللاعب ووافق ازاي ؟ “.

وشدد :”اللي حصل ان الزمالك تعاقد مع الجزيري في صفقه اعاره بقيمه ٨ مليون جنيه ، وبعدين قرر تفعيل بند الشراء بمبلغ ١٢ مليون جنيه واتأخر عن الدفع يومين او تلاته”.

وأضاف :”سألناهم التأخير ليه اتقالنا احنا بنسأل الفيفا هل موقفنا قانوني لو اتعاقدنا معاه ولا لا والفيفا أقر بصحه موقف الزمالك وامكانيه تسجيل اللاعب بشكل عادي “.

وأتم :” هناك عقد ثلاثي بين الزمالك والمقاولون العرب و اللاعب في اتحاد الكره بعد تفعيل الزمالك لبند الشراء من المقاولون العرب “.