مرتضى منصور يكشف عن سبب عدم قيد محترف اليد .. ويوجه رساله ناريه لجمهور الزمالك عن الصفقات
كشف المستشار مرتضى منصور رئيس مجلس إداره نادي الزمالك عن سبب عدم قيد محترف اليد چيمس باركر في صفوف الفريق على الرغم من خوض فريق اليد بالنادي لمنافسات بطوله كأس السوبر وإحتياج الفريق للاعب بعد رحيل سيف ويحيى الدرع عن النادي ، كما وجه رساله لجمهور الزمالك بشأن الصفقات الجديده.
وقال مرتضى :”في لاعب اسباني احنا جايبينه حاجه رهيبه ، كنا المفروض نبعت الاتحاد الاسباني والنادي بتاعه حوالي ٣٦٠ الف يورو و مش عارفين نسجله عشان الحساب محجوز عليه”.
وأكمل ،:”احنا عندنا بكره ماتش مهم قدام الاهلي في السوبر ومش عارفين نسجل اللاعب واحنا في حاجه ليه ، دي حاجه كده على الماشي لجمهور الزمالك”.
وواصل :”يا جمهور الزمالك المحترم ، انت ليك عندي صفقات وبطولات ولكن مينفعش تدخل اوضه العمليات على جراح اسمه فيريرا وهو شغال وعارف كل حاجه وتقوله افتح من هنا وهات ده”.
وأضاف :”ارجوكوا سيبوا الراجل يشتغل ويشوف شغله واحنا هنجيب احلى صفقات ، مفيش لاعب مشي الا بتعليمات من فيريرا ، واللي اتمدله اعاره برضو بتعليمات من فيريرا ، واللي اتعار اتمدله مده الاعاره في عقده ومتعملوش شرط جزائي”.
وشدد :”انا على اخري ، ارجوكوا يا جمهور الزمالك متضغطوش عليا انا لسه عندي ٦٤ فيديو بيشتموا فيا وكلهم سفاله”.
وأتم :”يا معالي رئيس الوزراء احنا مش هنقدر نكمل طول ما ممدوح عباس مستمر و طايح ومحدش واقف قصاده ، نادي الزمالك لو معرفش يجيب صفقات هيبقى موقوف عن القيد لمده ٣ فترات ، وانا بحظرك يا ممدوح عباس انت وابنك من غضب الجمهور”.
