“احنا جايبين الصفقات تقعدها على الدكة”.. هجوم حاد من جمال عبد الحميد على فيريرا بعد فوز الزمالك أمام فلامبو بدوري الأبطال
هاجم جمال عبد الحميد عضو مجلس إدارة نادي الزمالك، البرتغالي جوسفالدو فيريرا المدير الفني للفارس الابيض، بعد الفوز على فلامبو البوروندي في دوري أبطال إفريقيا.
وقال جمال عبد الحميد في الاستديو التحليلي لقناة الزمالك:” لوكنا بنلعب في تنزانيا وحققنا الفوز بهدف هنقول براڤو الجهاز واللاعبين على الفوز خارج الارض لكن انت بتلعب على ارضك”.
واضاف:” انت المفروض بتلعب على ارضك وجايب لعيبه بملايين وانت اللي مختارها، يجب ان تلعب طول الماتش علشان تنسجم، انت عارف الناشئين لكن اللعيبه الجديده لازم تنسجم اكتر وتكسب سكور”.
وتابع عبد الحميد:” بعتب على فيريرا ان الصفقات اللي اختارها ملعبتش طول الماتش، المفروض يلعبوا وقت اطول لانهم جايين اضافه اغيرهم ليه؟.
واردف:” الحمدلله على الفوز ولكن كان من المفترض نكسب بعدد من الأهداف خاصة وانت بطل الدوري”
وشدد عبد الحميد: “احنا دافعين ملايين في لعيبه جديدة، الزناري جايبه يقعد جانبك على الدكه هو ونداي تخرجه والوردي؟ “.
واستطرد:”اللي مزعلنا كمجلس ادارة انا بعملك كل اللي انت عاوزه وبريحك، المفروض يكون في افضل من كده.، ونقولك معسكر في الاسنكدريه لحد ماتش العوده ترفض؟”.
واختتم:” النهارده جرس انذار فلامبو كان بيلعب دفاع، بطل الدوري لمايلعب في المسابقه المحليه، هيكون دفاع، فين اللي هخترق به؟ هنفضل طول الوقت مش عارفين نخترق، ونجيب الهدف من كرة ثابته”.
