” عاوزنا نتهان زي الاهلي؟” .. مرتضى منصور يكشف سر انتقال محمود علاء للاتحاد السكندري رغم الخلاف مع مصيلحي !

كشف المستشار مرتضى منصور رئيس مجلس إداره نادي الزمالك عن سبب موافقته على انتقال محمود علاء لنادي الاتحاد السكندري رغم الخلاف مع مجلس اداره الفريق برئاسه محمد مصيلحي بسبب أزمه لاعب السله أنس أسامه .

وقال المستشار مرتضى:”انتوا بتقولوا سيبتوا محمود علاء سيبته ليه ؟ انتوا اللي قتلتوا محمود علاء بقله ادبكوا واجرامكوا” . 

وواصل :”في شويه عيال اتسنتروا في المدرجات يشتموه هو وامه ومراته والراجل يبقى رد فعل يتقال بص بيشتم الجمهور” .

وأكمل :”انتوا اللي مشيتوا محمود علاء و جايين تعيطوا عليه ، وبعدين القاضيه ممكن انتوا عارفين ظروف الماتش ده ايه”.

وتابع :”محمود علاء راح قال للراجل انا مش عاوز العب هو واوباما “.

وأضاف :”انا معنديش مشكله مع اسكندريه او اسماعيليه او اي محافظه ، لكن ممكن يبقى عندي مشكله مع مجلس اداره نادي ، هل ده معناه اني اعاقب محافظه كامله عشان خاطر محمد مصيلحي ؟ “.

وشدد :”اعاقب بلد كامله عشان انس اسامه ابو ضفيره ؟ بنروح هناك اي ماتش يستقبلونا احسن استقبال عشان لعيب اسمه مروان ؟ ايه التفاهه دي “.

وأردف :”محمود علاء عقده ١٢ مليون ومش هيلعب وهيلاعب عليه حسام عبد المجيد ، الراجل قالي مش هلاعبه الموسم ده ، هو كان فاضله ٤ مليون و ٢٠٠ الف و ال٢ مليون كمان ، اسيبه فالنادي عشان تشتمه ؟”.

وأتم :”انتوا عاوزنا نتهان في كل بلد زي الاهلي و نمشي فعربيه ترحيلات ؟”.