” لازم السبوبه تكمل ” .. حسني عبد ربه يفتح النار على إداره الإسماعيلي بعد إقالته من منصبه !!
فتح حسني عبد ربه نجم الدراويش السابق ومدير الكره المقال من منصبه النار على مجلس اداره النادي الإسماعيلي برئاسه المهندس يحيى الكومي بعد إقالته من منصبه .
وكان الاسماعيلي قد أعلن منذ قليل عن اقاله حسني عبد ربه من منصبه بعد الخساره أمام الأهلي بهدف نظيف في افتتاح مشوار الفريق في بطوله الدوري الممتاز.
وقال حسني :” المدير التنفيذي بلغني ان تم اقالتك وبس كده من غير اسباب ومن غير اي حاجه”.
وواصل :”بيتقال ان بسبب اللبس وشويه بسبب السهر ولكن انا راجل الحمد لله اخلصت واتحملت كتير وده عشان خاطر جمهور الاسماعيلي والاسماعيليه “.
وأكمل :”اهل اسماعيليه كانوا شايفين ان في فساد ولازم يتوقف الفساد ده ، جالي مكالمات كتير ان لازم توافق على اللبس الجديد من شركه مش معروفه ، مش انا اللي هلبس اللعيبه هي اللي تختار وتحدد ، لكن انا مش بتاع سبوبه ومجلس الاداره عاوز يمشي التعاقد مع شركه مش معروفه” .
وتابع :”انا اتحملت حاجات كتير وبتحمل وهتحمل عشان الاسماعيلي اللي عمل اسمي ، انا مليش دعوه بحوار اللبس وهما مصورين للناس ان حسني هو اللي مسيطر على اللعيبه ومخليهم يرفضوا ، دول بيقنعوا الناس ان حسني هو اللي صاحب الشركه التانيه وعاوز يعمل سبوبه” .
وأردف :”هو ده اللي بيحصل في النادي والضحك على الجماهير لازم الناس تعرف ده” .
وأضاف :”انا واثق ان قرار اقالتي النهارده ده ضغط على جاريدو عشان يمشي هو كمان الفتره اللي جايه ، جمهور الاسماعيلي هيتحرق دمه الفتره اللي جايه”.
وأتم :”لما يبقى في حد واقف قصاد السبوبه يبقى لازم يمشي عشان المصلحه تمشي” .
