” مينفعش أخرج اسرار بيتي برا ” .. محمود علاء يكشف أسباب رحيله عن الزمالك وموقفه من العوده للفريق الموسم المقبل !!
كشف محمود علاء لاعب نادي الزمالك المعار لفريق الاتحاد السكندري عن أسباب رحيله عن نادي الزمالك ، كما تحدث عن إمكانيه عودته للزمالك مره أخرى الموسم المقبل.
وقال علاء :”في البدايه لازم اشكر جمهور الزمالك كله على دعمه وحبه لمحمود علاء وجمايلهم على محمود علاء ، الناس دي شالت محمود علاء على دماغها”.
وواصل :”بشكر المستشار مرتضى منصور وأمير مرتضى منصور ، كان اهم مبدأ بالنسبالي طوال ٦ سنين اني معملش اي مشكله مع اي حد ، انا في لقطه اتاخدت عليا واعتذرت عنها و بعتذر عنها تاني دلوقت قدام الناس كلها” .
وأكمل :”انا كان كلامي مع مرتضى منصور وامير مرتضى اني اخرج بسلام ، المستشار مرتضى كان مقدر محمود علاء وقيمه محمود علاء ، انا خدت القرار بالرحيل من بعد معسكر المنتخب الاخير” .
وأضاف :”انا خارج سنه لمحمود علاء عشان ارجع تاني للزمالك ، انا روحت لنادي جماهيري لا يقل عن نادي الزمالك ومحترم وليه جمهوره برضو ، انا خرجت عشان ابقى متواجد في الملعب لان صعب عليا ابقى بعيد عن الملعب ، انا مش موظف عشان اروح التمرين وارجع” .
وشدد :”في حاجات مينفعش اتكلم فيها للاعلام لان الزمالك بيتي ومينفعش الواحد يخرج اسرار بيته برا ، انا لما رجعت من معسكر المنتخب مع ايهاب جلال كنت مصاب والفريق كان ماشي بشكل كويس وانا مكنش فيه فرصه ارجع ادخل تاني لان النادي عاوز بطوله والجمهور عاوز البطوله” .
وأردف :”استحاله اكون عملت مشكله مع فيريرا وفيريرا نفسه يطلع بقول او اي حد عرف يطلع يقول لان استحاله ده يكون حصل” .
وإستطرد :”كان في عرض من دبي والامور التعاقديه مكنتش انسب حاجه بالنسبالي ، الحاج محمد مصيلحي تعب معايا و١٠ ايام متواصله بيخلص في الصفقه ، ومن السبب الاول اني اختار الاتحاد انه نادي جماهيري لا يقل عن جماهيريه الزمالك” .
وتابع :”الحاج محمد مصيلحي عارف محمود علاء وعارف قيمه محمود علاء ، وبشكره لانه تعب معايا جدا ، وان شاء الله نعمل موسم يليق بنادي الاتحاد وجماهيره” .
وواصل :”كنت واخد قرار ان يبقى اعاره بس والزمالك برضو شاف ان الافضل تكون اعاره بس ما دام انا عاوز اخد تجربه جديده” .
وأضاف :”الناس قالت ان محمود علاء مشاركش كتير ، انا لاعب السنه الي فاتت فوق ال٢٠ ماتش ولكن اللقطه الاخيره هي اللي بتتاخد عشان ملعبتش اخر ٧ او ٨ ماتشات” .
وأتم :”احنا كان كل هدفنا مش مين يلعب ولكن هدفنا كان ان احنا ناخد البطوله ودي الاهم” .
