” 2 لعيبه الدكه مكانهم الدائم “.. سيف زاهر يكشف عن مفاجأت بالجمله في جلسه أمير مرتضى وفيريرا !!
كشف الاعلامي سيف زاهر عن العديد من المفاجآت خلال الجلسه التي جمعت بين المشرف العام على الكره بنادي الزمالك أمير مرتضى منصور والبرتغالي جيسوالدو فيريرا المدير الفني لفريق الكره الأول بنادي الزمالك.
وقال زاهر :”الكلام الي هقوله ده كبير قوي ومحدش قاله قبل كده ، فيريرا تمسك بكل الناشئين اللي معاه ورفض الاعاره او الرحيل ، وقال لامير دول اللي هيبقوا نجوم مصر السنه الجايه “.
وواصل :”فيريرا قال لامير انا معنديش كبير او صغير ، اللي هيلتزم معايا هو اللي هيلعب ، فيريرا قال لامير في ٢ لعيبه كبار في الفريق لو ملتزموش الدكه هتكون هي مكانهم الدائم”.
وأضاف :”فيريرا حط اللعيبه على المنظار وقال لامير مرتضى اللعيبه دي مش هتلعب الا لما تبقى جاهزه برا الملعب وجوا الملعب ، امير مرتضى قاله احنا لينا الملعب ، فيريرا قاله اللعيب اللي مش هيلتزم برا الملعب مش هيلعب معايا” .
وأكمل :”اللعيب اللي هيسهر مش هيلعب ، اللعيب اللي بيعمل مشاكل مش هيلعب ، اللعيب اللي مش ملتزم مش هيكون موجود معايا” .
وشدد :”امير خد قرار من شهر ونص او اكتر بعمل اداره جديده داخل الزمالك ، مهمتهم انه يتابعوا اللعيبه برا النادي وعاملين فايلات ، مين بيسهر و مين اتخانق ومين مش ملتزم ، اي حاجه خارجيه موجوده في الفايل بالساعه ، بالتاريخ بمكان حدوثها”.
وأتم:” مفيش حد هياخد فلوسه داخل نادي الزمالك الا لما يمشي على سطر واحد ، في لعيبه عندها خصومات ، والمشاكل بقت بتخلص في الغرف المغلقه مش زي الاول كانت المهندسين كلها تعرف المشكله” .
