كشف أحمد مرتضى منصور المشرف العام على العاب الصالات بنادي الزمالك عن أسباب تعثر العاب الصالات بالنادي هذا الموسم وخاصه كره السله .
وكان فريق السله بالزمالك قد ودع منافسات دوري المرتبط من الدور نصف النهائي بعد الخساره أمام الأهلي ، كما خسر الفريق المركز الثالث أمام الجزيره .
وقال أحمد مرتضى في تصريحات تلفزيونيه عبر برنامج ملعب أون تايم:”الرياضه عادي انك تكسب ماتش وتخسر ماتش ، انا قولت مبروك لمجلس الاهلي على ماتش الطايره وهما قالولي مبروك على ماتش اليد وهي دي الرياضه “.
وواصل :”انا توقعي السنادي هيبقى موسم جيد جدا لكل العاب الصالات ، في ناس بتسخن وهي مش فاهمه حاجه اصلا ، لعبنا الباسكت واحنا معندناش محترف ، قدرنا نوصل قدام الاهلي اننا نخسر فرق ٣ بس واي حد فاهم كان هيقول نخسر دابل سكور”.
وتابع :”لما تجيب لعيب اجنبي وفي ٦٥ مليون فالبنك ومحدش بياخد فلوس يبقى لازم يمشي ، كره اليد عاملين موسم رائع على الرغم من رحيل الاخوين الدرع وإيقاف وسام نوار والمحترف مش عارفين نقيده بسبب الفلوس”.
وأتم :”بقول للجمهور العبره بالخواتيم و ان شاء الله هنتوج بالبطولات في كل الالعاب” .
