رد أحمد سليمان عضو مجلس اداره نادي الزمالك والمرشح سابقاً لرئاسه الزمالك على أنباء اقامه انتخابات رئاسيه مبكره في الزمالك كما اقترح رئيس النادي ، مؤكداً ان رئيس الزمالك مرتضى منصور يعرف لعبه الانتخابات جيداً.
وقال سليمان في تصريحات اذاعيه عبر اذاعه نجوم اف ام :” الحل إيه؟ رئيس الزمالك بيقول انه هيعمل انتخابات مبكرة ؟ هو بيجيد لعبة الانتخابات وتزوير الانتخابات كويس جدا وهو اللي بيدير ملف الانتخابات كلها سواء في 2017 أو 2022″.
وتابع :”وللأسف انا كل مرة كنت بثق في وزارة الشباب والرياضة لكن ثقتي مكنتش في محلها ، هو يعلم جيدا أن الكل ضده الجمهور ضده والجمعية العمومية كمان ضده ، انا بعذر ناس كتيرة لان في ناس بتخاف تيجي تدي صوتها ولعيبة اعرفها كانت بتبقى جايه تشوف مرتضى تلف وترجع تاني”.
وأكمل :”ورغم كده انا خدت أصوات كبيرة جدا .. في ناس كتيرة دعمتني اتشطبت حاليا وانا نفسي اتشطبت واللي نزلوا معايا الانتخابات اتشطبوا واي حد وقف اتصور جنبي اتشطب ،ولو عايزين كشف بالاسماء دي ابعتلك”.
وواصل :” هاني زاده اللي كان أقرب واحد ليه وانظف واحد ليه ،بقى بيطلع يقال عليه حرامي وهاني مبيتحركشي نهائيا ولا حد بيتحرك، الناس بتشتم بالام والاب ومحدش بيتحرك ، انا دمي محروق واعذرني اني بفضفض لكن مش الزمالك اللي يخسر من فاركو ،الناس بترجع تلموني انا؟”.
وأضاف :”طب أانا هعمل ايه انا نزلت مرتين قدامه والناس شافت التزوير اللي حصل عيني عينك ومحدش اتحرك ، ناس قالت انسحب لا انا قولت هخش وهظهر الصورة لكل الناس ومكنشي ينفع اقول لا كنت هعمل خيبه امل لناس كتيرة “.
وأتم :”انا نزلت 2014 جبت أصوات اكتر من مرتضى منصور نفسه ومن احمد جلال ابراهيم اللي بيقال ملك الانتخابات ، فالحمدلله ليا رصيد عن الجمعة العومية ، لكن محدش بيتحرك والله والناس ساكته ومفيش حاجة بتمشي لوحدها”.
