كشف أمير مرتضى منصور المشرف العام على الكره بنادي الزمالك عن مصير الجهاز الفني لنادي الزمالك بقياده البرتغالي جيسوالدو فيريرا واسامه نبيه المدرب المساعد .
وكانت بعض الأنباء قد انتشرت الفتره الماضيه عن وجود خلافات بين فيريرا وجهازه المعاون ، ليحسم امير مرتضى الجدل بشأن هذه المسأله .
وقال أمير في تصريحات تلفزيونية عبر قناه الزمالك:”انا بطلب من المحللين والصفحات المعترضين على الاداره وعلى إدارتي انا لفريق الكوره ياريت يقول انت متجبش اللعيب ده وهات مكانه اللعيب ده لان ارقامه احسن” .
وواصل :”انا مش بشوف ده ، انا بشوف تجريح فيا وفي اللاعبين وده مش مجال اننا نرد على الناس دي” .
وتابع :”فرقه الزمالك مشي منها ١٢ لعيب وكان لازم تتبني ، واحد زي بن شرقي كان لازم يتفتح مسأله التجديد معاه من قبل نهايه عقده بسنه ونص وده محصلش “.
وأضاف :”اللجان معرفتش تجددله ،ولما رجعنا احنا حاولنا ومحصلش نصيب ومشي ، احنا جينا في الوقت الضايع “.
وأكمل :”اسامه نبيه كل ماتش نسمع اشاعات ان ده اخر ماتش ، برضو بيتقال فيريرا مشي ورجع عشان الشرط الجزائي ،الكلام ده بنسمعه في الصفحات وفي الاعلام والكلام ده مبيسمعش معانا” .
وشدد :”مستر فيريرا عقده سنه ونص واحنا متمسكين بيه لان ليه رصيد عندنا من ٢٠١٥ ومن السنه اللي فاتت ،المفروض الدعم يجي في وقت التعثر ،لان واحنا كسبانين طبيعي يبقى فيه دعم ، احنا متمسكين بالجهاز الفني كامل” .
وأردف :”مستر فيريرا عنده ظروف اسريه صعبه ، ابن مراته اللي هو مربيه اتوفى في سن صغير وده أثر عليه ، احنا قولناله لو عاوز تمشي احنا بنرفع عنك الضغط ورتب امورك” .
وأكد :”الراجل ده نجح معانا واحنا عارفين قيمته بغض النظر انه بيكسب او ميكسبش ، كابتن اسامه من الناس اللي بتساعده ، في تدعيم للجهاز بعنصر او اتنين بدل اللي مشي ، الكلام ده متفق عليه من شهرين، الاشاعات دي مش بتأثر فينا وكابتن اسامه مركز في شغله “.
وأتم :”اتمنى الناس تبقى واعيه اكتر لان مش طبيعي اتنين يبقوا متخانقين مع بعض وبيشتغلوا كل يوم تمرين والمباريات ، مستر فيريرا ليه حق تشكيل الجهاز وهو مشتكاش بقاله سنه ونص وانا مش عارف ايه مصدر الاشاعات ده” .
شاهد |
