خالد الغندور يوجه رسائل مدويه للاعبي الزمالك قبل مباراه بلوزداد الحاسمه بدوري أبطال أفريقيا!!
وجه الإعلامي خالد الغندور رسائل من العيار الثقيل للاعبي فريق الكره الأول بنادي الزمالك ، مؤكداً أن مباراه شباب بلوزداد الجزائري القادمه في دوري أبطال إفريقيا هي مباراه إنقاذ الموسم.
وقال الغندور في تصريحات تلفزيونية عبر قناه الزمالك:”احنا وضعنا في بطوله افريقيا احسن من الاهلي ، الاهلي لو كسب القطن هيستنى نتيجه الهلال ولو اتعادل او كسب مبروك خلاص للهلال” .
وواصل :”انت لو كسبت شباب بلوزداد حطيت نفسك في مكانه كويسه ، ومباراه الترجي وشباب بلوزداد هتبقى على حسابات التأهل” .
وتابع :”مجموعتنا مجموعه قويه ، مفيهاش فريق حصاله بيتغلب من كل الفرق زي القطن الكاميروني، ملعب المباراه كويس و الجماهير هناك في الجزائر محبه للكوره ، المباراه في توقيت مميز الساعه ٩ يعني فرصه كويسه تبرز امكانياتك”.
وأضاف :”امبارح لعيبه الزمالك مفيش دوافع ، كأنهم استستلموا والدوري انتهى ، واحنا قولنا مره واتنين وتلاته حتى لو فقدت البطوله اللي انت بطلها اخر سنتين مينفعش تفقد المركز التاني” .
وأكمل :”انت دلوقت بتضع نفسك في حسبه برما ، كل الجماهير الزملكاويه حاطها ايديها على قلبها لان مباراه بلوزداد هي مباراه انقاذ الموسم ، لو كسبت هتغير مزاج الزملكاويه ومزاجك انت شخصياً”.
وأردف :”الزمالك لعيبته ممكن تعطي حجج حتى لو مش حقيقيه ، عندنا حجز على الاموال وعندنا رئيس النادي محبوس ومفيش رئيس للنادي يدير الامور ، احنا منتظرين خلال ايام يخرج المستشار مرتضى ويعود لرئاسه الزمالك باذن الله خلال ايام قليله”.
وشدد :”بقول رساله للاعيبه الزمالك والجهاز الفني للزمالك من خلال قناه الزمالك ، الجمهور مستني رجاله في الملعب ، اعتبر ماتش شباب بلوزداد على ارضك لان ملكش حجه كل الظروف في صالحك ، اضغط واقطع زي ما عملت قدام الترجي ، لازم تنقذوا الموسم بتاعكوا ، لازم تفرحوا جمهوركوا اللي استحمل ما لا يتحمله بشر ، نتايج مخزيه في الدوري لو كسبنا كان زماننا متصدرين بسهوله ، احنا صابرين ومنتظرين يوم الجمعه”.
وأتم :”بعيدها تاني ، لو الزمالك اتأهل دور ال٨ الزمالك هيروح في حته بعيده جداً في البطوله ، النفسيه هتستقر والمستشار مرتضى خارج والفلوس موجوده وفلوس امام عاشور دخلت ، الماتش ده هيودينا في حته تانيه” .
