أكد الإعلامي أحمد حسام ميدو أن الزمالك سيتخذ بعض الخطوات من أجل ثوره تصحيح شامله في النادي وذلك بعد الإستقرار والإتفاق على رحيل البرتغالي جيسوالدو فيريرا.
وقال ميدو في تصريحات تلفزيونية عبر برنامج الريمونتادا:”التفكير دلوقت مش في مين يبقى المدرب الجديد ولكن الفكره كلها ان لازم يبقى فيه ثوره كبيره في قطاع الكوره ، وده مش كلام ميدو ده كلام المسئولين نفسهم” .
وتابع :”في تغييرات كتير جدا بتحصل دلوقت على مسئوليتي وهتبقى بدايه ان الزمالك يرجع تاني ، الزمالك خد قرار انه يشتغل كوره صح أخيراً”.
وواصل:”مفيش اي اسماء ولا اي استقرار واي حد بيقول كذا هيمسك هو بيرمي اي كلام وخلاص ولحد دلوقت فيه مفاوضات مع كذا اسم ولكن من غير استقرار على حد بعينه” .
وأكد :”نادي الزمالك بيفكر انه يأسس شركه كره حقيقيه ،شركه هتكون منفصله عن الاداره ليها رئيس ونائب رئيس و قسم تسويق عشان يجيب أموال ، الكلام ده غير الفلوس اللي بيكسبها الزمالك من العضويات والفريق عامه” .
وشدد :”الزمالك عاوز يجيب مدير رياضي ويصرف فلوس على قطاع الناشئين وتطوير الملاعب ، الزمالك خد قرار انه يخطط للمستقبل وفنفس الوقت مش هيهمل الحاضر” .
وأضاف :”الزمالك هيجيب ناس محترفه تمسك الشغلانه وهيساعد مع الناس الموجوده حالياً”.
وأكمل :”الزمالك هيفصل قطاع كره القدم عن النادي وهيبقى المسئول عنه شركه الكره ومدير رياضي هيبقى مسئول عن تقييم كل حاجه فالفريق “.
وأردف :”مش هقولكوا بقا نيوكاسل ولا ارسنال ، لا نادي صن داونز جاب مدير رياضي كان ماسك استكشاف المواهب في منتخبات الدنمارك ٧ سنوات وشوف دلوقت بيعمل ايه صن داونز وشوف الصفقات وشوف مرتبات اللاعبين وشوف طريقه اللعب ، الزمالك بقا عنده ايمان ان هو ده الطريق الصحيح” .
وإستطرد :”الاهم دلوقت ان الزمالك أخيراً بص للصوره الشامله مش بالفهلوه وان العمل المؤسسي هو الطريق وهو المشروع”.
وأتم :”اللي حصل الفتره اللي فاتت في الزمالك كان بمثابه قرصه ودن للمسئولين ، الاول كان بيحصل كبوات ولكن كان بيتقال الناس هتنسى بس دلوقت اول مره احس المسئولين عاوزين يطوروا ويبنوا بجد”.
