بعد رحيل مجلس الزمالك وتعيين لجنه تسيير أعمال… محامي الهارب كهربا يصدم جمهور الزمالك بخصوص غرامه اللاعب!!

أكد أشرف عبد العزيز محامي الهارب كهربا أنه حتى هذه اللحظه لم يحدث أي تواصل مع اللجنه المعينه لتسيير أعمال النادي بعد استقالة مجلس إدارة الزمالك، مشيراً أنه من الوارد خلال الساعات المقبله حدوث تواصل من أجل تقسيط غرامه اللاعب.

وقال عبد العزيز في تصريحات تلفزيونية عبر برنامج الماتش:”كل التحيه والتقدير لجمهور نادي الزمالك، وكفايه توتر وتعصب في الوسط الرياضي” .

وواصل:”مش معنى اني بتكلم في قضيه كهربا اني قاصد اضايق جمهور كبير زي الزمالك ده جمهور كبير وعظيم ، كفايه تعصب في الوسط الرياضي”.

وتابع:”موضوع كهربا احنا واخدين مهله شهرين للسداد ، وارد جدا تزيد المهله وده طبقا للوائح الرياضيه ، احنا بنشتغل لوائح وقانون مش بنقول اي كلام”.

وأكد:”دي كلها إجراءات ولو انت فاكر كان بيتقال كهربا هيتوقف بكره واحنا كنا بنقول لا لسه وده بناء على لوائح وقوانين دوليه ، احنا في المده دي بنستفيد من الطرف التاني وبنعمل كده عشان نحاول ان كل طرف يدفع اللي عليه”.

وأردف:”حتى الان مقدرش اصرح بأي حاجه تخص هل أفيش هيدفع ولا لا ولكننا مازلنا بنحاول”.

وأضاف:”انا عاوز اطمن جمهور الأهلي أن مفيش أدنى مشكله في سداد الغرامه ولكننا بنحاول ان كل طرف يدفع اللي عليه كهربا يدفع المليون و٢٠٠ الف دولار والنادي يدفع المليون و٢٠٠ الف دولار”.

وشدد:”لحد دلوقت محصلش تواصل مع اللجنه الجديده للزمالك ، الامر اختلف تماماً دلوقت وممكن يتم محادثات بين الطرفين الفتره القادمه وساعتها هنقدم عروضنا وممكن يتم الإتفاق”.

واستطرد:”انا لم اصرح بأي حديث لا النهارده ولا امبارح وكان في تصريحات تانيه على لساني تجاه شخصيات اخرى انا مقولتهاش”.

وأتم:”انا قولت ان جايز جدا نتقدم بعرض للجنه الثلاثيه من اجل التقسيط وطبعا جايز جدا خلال الساعات الجايه انا او كهربا نتواصل مع الاداره عشان نقسط” .