أكد أيمن الشريعي رئيس مجلس إدارة نادي إنبي ، أن عامر حسين واتحاد الكرة جاملوا النادي الأهلي بعد ارسال جواب اعتماده بطلا لدوري الشباب لحين انتهاء تحقيقات أزمة تزوير لاعب المصري البورسعيدي.
وقال أيمن الشريعي في تصريحات لبرنامج ملعب أون تايم المذاع عبر شاشة قناة أون تايم سبورتس الفضائية تقديم الإعلامي سيف زاهر : “عنوان المشكلة بتاع النهارده ، اسمها مشكلة لجنة المسابقات برئاسة عامر حسين”.
وواصل : ” احنا في فريق 2003 محترفين ، احنا عندنا مشكلة مع النادي المصري بسبب تزوير أحد اللاعبين ، احنا بعتنا يوم الاربعاء مستندات كاملة للمدير التنفيذي علشان يبعتها لرئيس لجنة المسابقات وناخد نقط مباراة المصري ” .
وأكد : ” احنا باعتين مستندات للاعب بيلعب بإسم ومواليد 97 في بني سويف ، وبيلعب مع المصري بإسم تاني ومواليد 2003، وصورة الكارنية واحدة”.
واضاف : ” كلمت المحترم احمد دياب ، يوم الجمعة ، انا مبعرفش اتعامل مع لجنة المسابقات علشان كدا بتعامل مع احمد دياب ، انا بكلمه علشان حماية الشكل العام وشكل الكرة في مصر مش علشان الماتش” .
واستمر :” وقلتله قبل الماتش هيبقي فيه مهزلة او مجزرة وهيبقي مسئول عنها رئيس لجنة المسابقات ، وعلى الأقل كان يتم اخطار الناديين ، أن محدش يحتفل بالدوري قبل حسم مصير مشكلة التزوير”.
وشدد : ” اكتشفت أن احمد دياب قالي انتي مبعتش شكوي ، قلتله لا انا قدمت شكوي ودا رقمها ، قالي فعلاً الشكوي كانت مركونه”.
واستطرد :” لقيت احمد دياب بيكلمني ومحدش كلمني من لجنة المسابقات أو إتحاد الكرة ، لقيت دياب بيكلمني بين الشوطين بيقولي الشكوي دخلت اللجنة ، قلتله دا الماتش بيتلعب !!”.
واستطرد : ” لعيبتي أول ما الماتش خلص احتفلوا اوتوماتيك لأنهم عارفين انهم الأبطال ، لكن لعيبة الأهلي محتفلتش وراحو للدكة ، قالولهم اجروا واحتفلوا ، بعدها احتفلوا وجريوا ، ومكنتش أتمني الأمور تمشي كدا “.
واضاف ” لقيت بعد الماتش بنص ساعة ، اتحاد الكرة بيقول في جواب ، ان الأهلي بطل الدوري وفقاً للائحة لحد ما التحقيقات تنتهي”.
وواصل”مكانش ينفع الجواب دا يطلع ، كان لازم تبلغ الناديين أن مصير البطولة معلق لحين إنتهاء الشكوي”.
وقال :” من الاخر إنبي بطل الدوري بفارق ٣ نقط عن الأهلي ووليد العطار عارف كدا ، و عامر حسين عارف كدا ، والأهلي عارف كدا ولعيبته عارفه كدا”.
وأشار : ولو إدارة الأهلي وانبي معندهمش سيطرة على لعيبتهم ، كانت حصلت مجزرة”.
وأتم ” قرارات لجنة المسابقات بعد جواب النهارده ، مش قادر اوصف عمل معانا ايه ، جواب في معايير الإدارة لا يملك أي حيادية واتحاد الكرة يعلم ده”.
شاهد الفيديو
