أكد أوسكار رويز رئيس لجنة الحكام بالاتحاد المصري لكرة القدم، أن ما أُثير بشأن تصريحاته السابقة حول حكام مباراة القمة في الموسم الماضي جاء نتيجة سوء فهم في الترجمة.
وقال في مداخلة هاتفية ببرنامج “ملعب أون”، عبر قناة “أون سبورت” ردا على سؤال سيف زاهر، “تواصلت النهارده مع مسؤول في اتحاد الكورة المصري أكد لي إن موضوع الزمالك والأهلي هو موضوع فيه سوء تفاهم. حضرتك صرحت مع زميلنا إبراهيم عبد الجواد إن ما حدش طلب منك إن أنت تجيب حكام زمالك واهلي، الأهلي كان بعت ثلاث جوابات، الأهلي استشهد بكلام حضرتك وقال إن إزاي بعد كل ده يقوم يطلع رئيس لجنة الحكام يقول إن ما فيش حد طلب. تواصلنا مع المهندس هاني أبو ريدة ومسؤول اتحاد الكورة المصري قالوا إن حضرتك كنت شريك في الجلسة وهم بيخاطبوا الاتحادات. أين الحقيقة؟:” يوم اللقاء، كنت أنا بتكلم مع المترجم بتاعي لأن هو.. لأن أنا ما كنتش عارف إيه الماتش اللي هم بيسألوني عليه، يعني كان عندنا ماتش زمالك قبل كده أهلي وزمالك قبل كده، أنهي واحد فيهم بالضبط؟”.
وتابع:” بس أنا كنت.. هو كان بيسأل يعني على الماتش الأول اللي أنا كنت رئيس فيه وجانا الخطاب يوم 9 مارس كان يوم حد، وطبعاً أوروبا ده يوم إجازة بالنسبة لهم طبعاً إجازة في أوروبا لكن في مصر والدول العربية لأ، لكن الماتش كان يوم 11″.
وواصل رويز: “باشمهندس أبو ريدة ودكتور مصطفى اشتغلنا عشان ندور على حكام من أوروبا وكان في حاجة إيقان، لو حضراتكم شفتوا في التواريخ لو دورتوا في جوجل أو في الجدول كان في دوري الأبطال والدوري الأوروبي، وكان في 24 حكم فار و24 حكم رابع كانوا شغالين في أوروبا في الماتشات بتاعة أوروبا”.
وأردف:” دوري الأبطال بدأ يوم الثلاثاء في ساعتها وإحنا اتكلمنا بالتليفون علشان كان في ضغط كبير جداً، لكن الباشمهندس أبو ريدة اتعامل بعلاقاته في أوروبا واجتمعنا مع دكتور مصطفى وكنا بنفكر إن إحنا نجيب حكام من البرازيل ولكن ده كان في الجزء الثاني من القارة فكانت المسافة طويلة جداً والرحلات طويلة، لكن إحنا فعلاً اشتغلنا لكن في 48 ساعة مطلوب مننا نجيب حكام أجانب كان صعب”.
وتدخل الإعلامي سيف زاهر وسأله:” ده ما يخص كلام حضرتك يا مستر أوسكار، حضرتك قلت مجلناش خطابات، في نقطة هنا مهمة حضرتك قلتها، حضرتك قلت كان محمود بسيوني هو حكم المباراة فحضرتك في اللحظة دي عارف إن زميلنا إبراهيم عبد الجواد بيسألك على المباراة دي؟.
ليجيب رويز: “كان في لخبطة لأن إحنا جانا الرد، رد الاتحادات وإحنا كلمناهم بالتليفون برضه لأن ما كانش في وقت إن إحنا نعمل أكتر من كده. في الوقت أول جزء من الفيديو كنت بتكلم مع المترجم بتاعي علشان أفهم بالضبط إيه السؤال أو أنهي ماتش، لكن ما كنتش بتكلم مع الجمهور”.
وعاد سيف زاهر قائلا: هل يا فندم يعني في النهاية انطلب من حضرتك حكم لهذه المباراة ولا ما انطلبش؟ ليرد أوسكار:” الخطاب جاهز يوم 9 والماتش يوم 11 فقدامنا 48 ساعة فقط. إحنا دلوقتي الأندية دلوقتي بعتت بفترة طويلة وإحنا كمان طلبنا الحكام وهنجيب، وكان طالبين خمس دوريات كبرى وفي ثلاث دول منهم رفضوا”.
وأشار:” الدول اللي رفضوا؟ إنجلترا، إيطاليا، وفرنسا”.
وسأل سيف زاهر مجددا: طيب تمام، يعني إذاً تصريح حضرتك النهارده إن بناءً على تصريحك إن كان حديث حضرتك مع زميلنا إبراهيم عبد الجواد مع مترجم حضرتك اللي هو معانا دلوقتي، إن السؤال لحضرتك كان فيه سوء تفاهم ولكن الحقيقة اللي حضرتك قلتها بناءً على القصة اللي حضرتك بتحكيها، ما يخص مسألة بقى طلب الحكام الأجانب، هل دي مفتوحة؟ والمُدة القانونية قبليها بكام يوم؟ يعني قبل بكام يوم مسموح لأي نادي إن هو يقدم أو يطلب؟
و أجاب أوسكار:” اللوائح طبعاً 10 أيام قبل الماتش ومفتوح لأي نادي يطلب وده موجود في المسابقات أو في أي لوائح يعني موجود الكلام ده، وطبعاً في إجراءات بتتم سواء مادية أو إجراءات إدارية”.
وبشأن هل حصل حديث ما بين حضرتك ووفد النادي الأهلي في الجلسة اللي كانت موجودة في الاتحاد؟ ذُكر إنهم أما طلعوا ما كانش موجود غير حضرتك قعدوا معاك، هل اتكلموا معاك في موضوع ماتش الأهلي والزمالك أو إحنا كنا طالبين حكام ولا المسألة دي ما اتفتحتش خالص؟ أردف:” ما تكلمناش في الموضوع ده خالص.
وأكمل ردا على سؤال هل حصل حديث ما يخص الفار أو التحكيم أو حضرتك كلمتهم في وجهة نظرك في الحالات اللي عليها قصة ولا ده برضه ما اتفتحش؟”إحنا مع رئيس الوفد الأهلي رحبنا بيه واتكلمنا إن الاتحاد طبعاً مرحب جداً إن أنتم تيجوا تسمعوا كل المحادثات اللي حضراتكم عايزين تسمعوهم، وإحنا كنا محضرين كل حاجة طبعاً واتكلمنا مع رئيس الوفد وإحنا قلنا لهم قرار الاتحاد ولكن إحنا كنا بنتكلم بشكل رسمي”.
وزاد مجيبا على سؤال هل كان في تفاوض في مباراة الزمااك والأهلي اللي إحنا بنتكلم عليها اللي حصل فيها انسحاب مع طاقم حكام برازيلي ولا دي كلام مجرد إشاعة سمعناه؟ هل حصل جلسة مع الدكتور مصطفى عزام وكنتم بتتكلموا على طاقم حكام برازيلي ولا دي قصة مش موجودة؟
“إحنا حطينا الكلام ده في الاعتبار وإحنا اتكلمنا مع الاتحاد عشان الأوروبيين كان عندهم قيود كتير لو حضراتكم شفتوا ساعتها الجولة في أوروبا. وكان الديربي بتاع الإمارات كان حكم من جواتيمالا في الوقت ده، وكان طبعاً بيجيبوا حكام برازيليين كولومبيين أوروجويانيين عشان ما كانش في مساحة من أوروبا تبعد لأن في قيود دلوقتي طبعاً. وإحنا كلمنا دكتور مصطفى اللي كان طبعاً متابع معانا جداً وكان دائماً بيبقى معانا وبيساعدنا كتير جداً في الموضوع، وأنا اتكلمت معاه إنه نجيب حكام من أمريكا الجنوبية أو من المكسيك لكن طبعاً الرحلة طويلة جداً وطبعاً مادياً أصعب لأن بتبقى أغلى طبعاً.
و إكمل:” بعض الأندية دلوقتي طالبة زي سموحة إن هي تسمع الفار، ده حق أصيل لكل الأندية في الفترة القادمة؟:” مش أول مرة السنة اللي فاتت في فريق طلب إنهم يسمعوا وقلنا لهم طبعاً تعالوا اسمعوا، إحنا كاتحاد مش بنخبي حاجة إحنا دائماً في شفافية، لكن في متطلبات وإجراءات الاتحاد هو اللي بيحطها كشروط زي مصر هنا أو في الأرجنتين أو في الإكوادور أو السعودية في إجراءات والاتحاد هو اللي بيحطها”.
وأختتم ردا على سؤال:” هل من حقي أسمع الفار من أول الماتش لآخر الماتش بالموقف اللي بعد المباراة ولا حضرتك بتسمع على قد الحالة؟:” اللي هم عايزين يسمعوه يقدروا يسمعوه ما فيش قيود خالص. إحنا لجنة الحكام كنا محضرين كل حاجة وعشان يسمعوا كل حاجة اللي هم كانوا هيطلبوه كانوا هيسمعوه، أي شكوك يقدروا يسمعوها، لجنة الحكام جاهزة إن النادي يجي ويسمع فما فيش مشكلة خالص بالنسبة لنا كلجنة حكام”.
