رد ناري من شوبير على منتقديه بشأن تصريحاته عن تأهل الزمالك لنهائي الكونفدرالية.. “مش هشتغل على هواك”

رد الإعلامي أحمد شوبير، على منتقديه بعد إشادته بالزمالك وجماهيره بعدما حسم تأهله لنهائي الكونفدرالية الإفريقية.

وقال شوبير، في تصريحات تليفزيونية ببرنامج “الناظر”، عبر قناة “النهار”:” خليني أتوقف هنا شوية، لأنه يبدو إن البعض متخيل إنه عشان مثلاً أحمد شوبير ده أهلاوي، فإنت لازم كل ما تتكلم يبقى الكلام على النادي الأهلي فقط لا غير، تمام؟ النادي الأهلي ده حاجة بالنسبة لي وبالنسبة لنا ده حاجة عظمة العظمة وحاجة كبيرة والواحد بيفتخر بيها تماماً”.

و أضاف: “​لكن لما نادي الزمالك بيعمل موسم زي ده، لما نادي الزمالك يوصل لنهائي الكونفدرالية، لما نادي الزمالك جماهيره تعمل ملحمة، إنت حضرتك عايزني أطلع أتجاهل ده؟ أطلع ما أقولش ده؟ وبعدين يقولك إيه: ‘وإنت مهما حاولت إن إنت يعني تقولهم وتستقطبهم’.. أستقطب مين وليه أصلاً؟ يعني أنا بدي لكل ذي حق حقه، ده طبيعة الإعلام، أنا بتكلم عن نفسي ماليش دعوة بغيري يعني”.

و شدد شوبير:” ​فما يكون الزمالك جمهور امبارح مالي استاد القاهرة، أما يكون الزمالك صاعد لنهائي الكونفدرالية، لما يكونوا الأولاد بيؤدوا بروح.. وأنا امبارح قلت الزمالك لم يقدم عرضاً جيداً لكنه الزمالك عمل المطلوب منه إن هو يصعد للنهائي، هو مش لازم يلعب كويس مش مهم، المهم إنه يكون في المباراة النهائية والمهم إن شاء الله إنه يكسب الكونفدرالية”.

وزاد: “​فأنا أطلع أقول إيه؟ مبروك للزمالك صعد للكونفدرالية وبعدين أقوم جاي مكمل؟ إزاي؟ يبقى إحنا بنهرج! يبقى إحنا مانقفش الوقفة دي؟ يبقى إحنا مانقفش الوقفة دي؟”.

​ و أشار شوبير:” أنا بشتغل في قناة عامة، بشتغل في قناة لكل الناس، وبالتالي من حق كل الناس إنها تعرف كل الأخبار، فده أمر عجيب جداً يعني. وأهو بقول لحضرتك على الهواء: مش هشتغل على هواك خالص، هشتغل على هوى الصح، هشتغل على هوى الحقيقة، هشتغل على هوى اللي بيحصل في الشارع الرياضي”،

و واصل: “الشارع الكروي، ده الطبيعي. ولك مطلق الحرية حضرتك عايز تتابعني تابعني، مش عايز تتابعني ماتتابعنيش، ولك كل الحب في كل الأوقات”.

وأردف:” ​لكن مهم جداً إن أنا أدي الفريق اجتهد وثابر وكافح وجاهد حتى وصل إلى ما هو عليه، أديله حقه وأدي الإدارة حقها وأدي اللعيبة حقها وأدي للجمهور حقه، ده طبيعي جداً. فإحنا هنزرع التعصب؟”.

وأكد شوبير: “​أنا هل ممكن حد في الدنيا يتجاهل هذا المشهد اللي قدام حضراتكم على الشاشة؟ هل ممكن حد يتجاهل إن الزمالك في نهائي الكونفدرالية؟ هل ممكن حد يقول إنه الزمالك لم يخسر ولم يدخل مرماه (هدف)؟ حد يتجاهل هذا الأمر؟ ماحدش يقدر يتجاهل”.
​
و أستطرد:” وفي نفس الوقت أنا اللي بقولك إن الزمالك لم يكن موقوف القيد والزمالك عمل 10 صفقات وعديتهم لك، أه ماعملش في الشتوي لكن عمل 10 صفقات، عليه 14 قضية، عليه 24 قضية، عليه 400 قضية.. هذا موقف إداري هم يحلوه، لكن أنا برصد واقع هنا.”

و تابع شوبير: “​وبعدين ألاقي بعض الزملاء ياعيني قُم جاي خايفين وعايزين يمسكوا العصاية من النص.. عصاية إيه اللي تتمسك من النص؟ يعني العصاية لها جزء هنا ولها جزء هنا ولها جزء هنا، ولازم تتكلم بكل أمانة وبكل احترام وبكل تقدير وبكل نقد لما يكون هناك ما يدعو إلى النقد، ده طبيعي جداً يعني”.

واختتم:” ​فهنيئاً للزمالك مرة أخرى، ونبارك للزمالك مرة أخرى، ونبارك لجمهوره مرة أخرى ولإدارته وللاعبيه ومسؤوليه يعني.. ده أمر منتهي”.