”ليلة انهيار المنظومة”.. شوبير يفتح النار على الكل في الأهلي بعد الخسارة من بيراميدز!”
في هجوم هو الأعنف من نوعه، وصف الإعلامي أحمد شوبير وضع النادي الأهلي الحالي بـ “الكارثة الكروية”، مؤكداً أن الفريق يعيش واحداً من أسوأ مواسمه عبر التاريخ، بعد أن تجرع مرارة الهزيمة بثلاثية نظيفة أمام بيراميدز، ليخرج الفريق “صفر اليدين” من المنافسة على الألقاب الكبرى.
وقال شوبير، خلال تصريحات تليفزيونية ببرنامج “الناظر”، عبر قناة “النهار”: “النهارده كان يوم مثير جداً في الدوري المصري، يوم حافل، يوم كان في غاية الأهمية. كل العيون اتجهت عصراً إلى مباراة الزمالك وإنبي في استاد القاهرة، ثم مساءً إلى مباراة بيراميدز والأهلي في استاد الدفاع الجوي”
وتابع: “إنبي عملها عصراً وتعادل مع الزمالك بدون أهداف في مباراة كانت مثيرة وحافلة وضياع أهداف، سواء من إنبي اللي سيطر على الشوط الأول أو الزمالك اللي سيطر على الشوط الثاني. إنبي كان ممكن يسجل هدفين أو ثلاثة في الشوط الأول خاصة، والزمالك كان ممكن يسجل هدفين أو ثلاثة في الشوط الثاني، لكن انتهت المباراة بالتعادل السلبي بدون أهداف”.
وأكمل شوبير:” فرحت جماهير النادي الأهلي وفرح مسؤولي بيراميدز لأنه الأمل تجدد من جديد، خاصة جماهير النادي الأهلي. زي ما بنتكلم على جماهير الزمالك والملحمة اللي بتعملها، نتكلم على جمهور النادي الأهلي؛ النهارده كان كامل العدد، كامل العدد ما فيش كرسي فاضي في مقاعد النادي الأهلي”.
وشدد: “جماهير من قبل المباراة بتهتف وبعدين زادت معنوياتها جداً بعد تعادل الزمالك وقالت لك خلاص بقى الكرة في ملعبنا، نكسب النهارده هيبقى فرق ثلاث نقاط، نلاعب الزمالك نكسب الزمالك نخلص النقاط، نبقى احنا متقدمين بالمباريات أو المواجهات المباشرة”.
وأردف:” لأنه الأهلي في أشد الاحتياج للفوز ولكن تأتي الرياح بما لا تشتهي السفن، نحيي إنبي الأول على أداؤه الرائع والرجولي والـ ‘Fair Play’ أمام الزمالك، والزمالك أهو طلع من المباراة بنقطة مش من غير نقاط على الإطلاق. أما الأهلي فحصل الأمر العجيب جداً؛ الأهلي فجأة بدأ الانهيار في الشوط الثاني، لخبطة، دربكة، تسديدة تاخد إيد مصطفى شوبير وتسكن الشباك، وبعدها الأهلي يتعادل بهدف أراه صحيحاً لمحمود تريزيجيه حتى بالخطوط من وجهة نظري، لكنه حتى لو الهدف صحيح، بعدها على طول فيستون مايلي جاي مسجل الهدف الثاني”.
و أستأنف شوبير: ” هزيمة قاسية وعنيفة وثقيلة للنادي الأهلي بثلاثية أمام بيراميدز. تفتكروا امبارح مع ضيوفي قلت إنه الزمالك بيكسب بيراميدز وبيراميدز بيكسب الأهلي والأهلي بيكسب الزمالك؛ ده أنا قلته امبارح وقلته أول امبارح ودايما بقول الزمالك كعبه عالي على بيراميدز، بيراميدز كعبه عالي على الأهلي، الأهلي كعبه عالي على الزمالك، لكن الله أعلم المباراة اللي جاية ممكن يحصل إيه في الحالة المتردية اللي فيها النادي الأهلي”.
و استرسل: “اشتعلت السوشيال ميديا بعد المباراة غضباً من مجلس إدارة النادي الأهلي، غضباً من مدرب النادي الأهلي، غضباً من لعيبة النادي الأهلي، وأصبح الأمر شديد الصعوبة، خلاص فاضل لك ثلاث مباريات، مبدئياً الأهلي خارج بطولة أفريقيا الموسم المقبل، ده مبدئياً، لأنه عشان يدخل بقى واحسب الحسابات لازم يكسب الزمالك ولازم بيراميدز يخسر وشغلانة صعبة، فالأهلي غالباً خارج البطولة الأفريقية، بل قد لا يلحق بالمركز الثالث لأنه الفارق بينه وبين سيراميكا اللي كان مريح النهارده هي نقطة وحيدة”.
و أضاف شوبير:” من الأقرب للفوز ببطولة الدوري العام؟ بوضوح شديد جداً الزمالك؛ ليه؟ لأنه الزمالك عشان بيراميدز يبقى بطل الدوري لازم الأهلي يكسب الزمالك فالأهلي يبقى 47 بونت وبيراميدز يكسب مبارياته، لكنه الزمالك حتى لو تساوى مع بيراميدز في النقاط فهو البطل بفارق المواجهات المباشرة لأنه فاز على بيراميدز ذهاباً وإياباً”.
وأشار: “الزمالك هو بطل الدوري العام. فالزمالك نظرياً هو الأقرب لكنه الدنيا اتدربكت شويه، يعني مباراة الزمالك وسيراميكا مباراة مش بالسهلة، الأهلي خلاص طلع بره المنافسة، أما نرجع ثاني نشوف جدول الدوري العام فالأهلي خلاص بره المنافسة رسمياً، يعني نظرياً آه مازال عنده أمل لكنه ست نقاط باقي ثلاث مباريات، هيكسب المنافس المباشر يا سيدي الزمالك هيبقى 47 والزمالك يظل 50، بيراميدز عنده مباراة يكسبها يبقى 50، فالأمر صعب جداً جداً”.
واستطرد شوبير:” الفرصة جت للأهلي النهارده إنه يقرب بحيث إنه يفوز على المنافس لكنه ما استغلهاش. الزمالك جت له الفرصة النهارده إنه يفوز وإنه يبعد لكنه ما استغلهاش. اللي استغل الفرصة هو بيراميدز، مش استغلها بس ده استغلها وقعد وربع رجليه في مواجهاته مع النادي الأهلي. ده الموقف اللي موجود، يعني أخطاء بقى بالجملة في الأهلي، مش هقول أخطاء في التشكيل ولكن المنظومة كلها فيها مشكلة.”
واستكمل: “أخطاء بقى بالجملة في الأهلي، مش هقول أخطاء في التشكيل، لكن المنظومة كلها فيها مشكلة. ما هي جماهير الأهلي مش هتفضل تستنى ماتش كرة طايرة بنات أو ماتش هاند بول، كل ده جميل وحلو، لكن قلت لك قبل كده الأهلي نادي كورة”.
وأكد شوبير:” جماهير النادي الأهلي العاشقة المتيمة المحبة عملت كل حاجة، فهي جماهير كورة في الآخر، عايزة فرقتها تكسب. وموسم صفري للأهلي؛ حد يقول لي الأهلي كسب السوبر في البداية، ماشي يا سيدي هحسبها لك بطولة وهي بطولة، لكن موسم في المجمل صفري، قصة إنك تشيل مدرب خلاص المدرب ماشي، هم ثلاث مباريات، فبدل ما هتدبس في 6 مليون يورو هتستحملهم بقى، تجمده وتخلي الكابتن عادل مصطفى هو اللي يدير.. اللي انت عايز تعمله اعمله، لكنه هيظل موجود الثلاث مباريات دول وشكراً جزيلاً، انتهت قصة توروب مع النادي الأهلي، خلاص الموضوع انتهى، ملوش بخت”.
و اشار: “المطلوب من الأهلي إنه يقعد ويعيد الحسابات وينسى هذا الموسم، هو واحد من أسوأ المواسم في تاريخ النادي الأهلي. لما بتخرج من فريق من القسم الثاني من كاس مصر (فريق الاتصالات) وبتمر مرور الكرام، وما حدش يكلمك يقول لك أصل اللعيبه الدوليين ما كانوش موجودين! لما تجي لك الفرصة بدل المرة عشرات المرات إنك تتجاوز الأزمة والمحنة والنتائج وترجع، وكل ما تجي لك الفرصة بترفصها برجليك تقول لا أنا مش عايزها”.
وقال:” سمعنا من شهر تقريباً الكابتن خطيب سلم ملف الكورة للسيد ياسين منصور والكابتن سيد عبد الحفيظ وقال لك أنا بعيد عن القصة.. طيب هل شفنا حاجة؟ استبعاد لجنة التخطيط ما مالهاش دور دلوقتي، استبعاد لجنة التعاقدات ما مالهاش دور برضه دلوقتي. هل معقول الأهلي بطل أفريقيا وبطل مصر ما عندوش مهاجم؟ هل هيفضل يعمل تباديل وتوفيق؟ مرة شريف، مرة مروان عثمان، مرة أشرف بن شرقي، مرة طاهر يدخل راس حربة؟ مش معقول!”.
وزاد: “فجماهير الأهلي هتتجنن وهتبات ليلة حزينة، ليلة كئيبة، ليلة صعبة. أما بيراميدز فله كل التحية، خسران من ثلاث أربع أيام أمام الزمالك وعنده إصابات، ومع ذلك بيلعب النهارده وبيفوز، وبيفوز بدل الهدف اثنين وثلاثة، جماهير النادي الأهلي الحزن على وجوهها، الألم، المرارة، الغضب، لكنها فضلت مساندة النادي الأهلي النهارده وهتروح الماتش الجاي بتاع الزمالك لأنها بقت بطولة خاصة لأنقاذ ما يمكن إنقاذه. الأهلي ملوش في الدوري خالص، انسى موضوع الدوري بالنسبة للنادي الأهلي، على أمل تعثر المنافسين إنه يلحق مركز ثاني ويلعب في أفريقيا، وهو أمل لا يتجاوز 15% أو 10%.”.
واختتم:” الأمر في الأهلي شديد الصعوبة وشديد الحرج وشديد الألم، ما فيش لعيب في حالته لا أساسي ولا احتياطي، بدءاً من حارس المرمى لحد اللعيبه اللي نزلت، ولا لاعب في حالته خالص.
يمكن أشرف بن شرقي حاول شوية، إمام حاول شوية، مروان عطية حاول شوية، لكن مش ده النادي الأهلي خالص على الإطلاق، الأهلي في حاجة إلى ثورة، ثورة إدارية، إن الإدارة تقعد وتشوف القصة شكلها عاملة إزاي وتشوف إيه اللي حصل وتشوف إيه المشاكل وتشوف إيه الأزمات عشان تحلها.”
