واصل الإعلامي أحمد شوبير اعترافاته الصريحة حول الحالة المتردية التي يمر بها النادي الأهلي هذا الموسم، واصفاً إياه بـ “الموسم السيء” الذي شهد غياباً تاماً للبطولات، ومطالباً الجماهير بضرورة الالتفاف حول الفريق لتجاوز هذه الكبوة التاريخية.
وقال شوبير، خلال تصريحات تليفزيونية ببرنامج “الناظر”،عبر قناة “النهار”:” ليلة كروية استثنائية، ليلة من العيار الثقيل، الأنظار كلها بتتجه إلى قمة الدوري المرتقبة المباراة دي لا بتعترف لا بحسابات ولا بتخضع لأي تكهنات، مباراة بتتوقف فيها كل الحسابات التقليدية”
و اضاف: “ولغة الأرقام كلها بترجع، لأنه دي ليلة الزمالك والأهلي
أياً كان ترتيب الفرقتين، تظل قمة من قمم كرة القدم المصرية. المواجهة دي مش فقط بالنقاط، بل بقيمتها التاريخية وتأثيرها على شكل سباق اللقب. مباراة قد يعني تحدد من هو بطل الدوري العام، أو ممكن تعيد المنافسة حتى الرمق الأخير في البطولة.
وشدد شوبير:” مدرجات جماهير هي الأهم، هي الرقم الصعب دائماً وأبداً. هي دايماً مش مباراة، هي بطولة خاصة، بطولة خاصة عنوانها الكبرياء وتفاصيلها بتكتب في ذاكرة الجماهير.”
وأكمل: “مش عاجبني أبداً حملة التشكيك سواء في مجلس الإدارة بقيادة كابتن خطيب أو على اللعيبة أو أو.. لأنه لو حضرتك ناسي إن رئيس النادي ده كابتن محمود الخطيب اللي قاد النادي إلى انتصارات خيالية أفريقية ومحلية وعربية ودولية، وإن النادي الأهلي عاش معاه أسعد وأمجد وأروع الأوقات”.
وواصل شوبير:” آه في كبوة، آه في مشكلة، آه في أخطاء، والبيان اللي طلعه النادي الأهلي بعد مباراة الترجي قال نعترف أن هناك أخطاء إدارية وأخطاء فنية، وقال إنه جاري التصحيح. وأنا بحاول أتصل بناس وأحاول أعرف من ناس هم شغالين في هذا الإطار؛ ممكن يكونوا اتأخروا شوية، ممكن يكون جانبهم الصواب في بعض الصفقات، ممكن يكون جانبهم الصواب في بعض القرارات، بيحصل وحصل وهيحصل. لكنه إنه من العيب إنه تبدأ الحملة على شخص واحد”.
و اردف: “أنا لا بحب الإشادة بشخص واحد، بتكلم تحديداً على الكابتن محمود الخطيب لأنه لما النادي بيكسب يبقى النادي كله كسب؛ مجلس الإدارة بقيادة كابتن محمود الخطيب، الإدارات المختلفة في النادي الأهلي، جمهور النادي الأهلي، لعيبة النادي الأهلي، الأجهزة الفنية للنادي الأهلي. ولما بيخسر كلهم بيخسروا، لا المكسب يصب في اتجاه الكابتن الخطيب لوحده ولا الهزيمة تصب في اتجاه الكابتن الخطيب لوحده”.
و أشار شوبير:” ثم مش دايماً أنت تقدر تلاقي رمز، ميزة النادي الأهلي دائماً وأبداً إنه عنده رموز، فلما تتكلم على كابتن صالح سليم فهو رمز، لما بتتكلم على الكابتن حسن حمدي فهو رمز، لما بتتكلم على الكابتن محمود الخطيب فهو رمز. هل معنى ده إن الرمز لا يخطئ؟ لا، يخطئ ويصيب لأنه بشر، ياخد قرارات والقرارات تطلع خاطئة ده عادي جداً”.
و أستأنف: “أحياناً الأمور بتبقى زيادة شوية، أحياناً بتسدوا ودانكم شوية، أحياناً ما بتحبوش تسمعوا شوية، لكن لما تيجي فرصة إنك تسمع وإنك تصلح فده إنك راجع على الطريق الصحيح وده الأهم. أنا الحقيقة بأبدي أسفي الشديد على الحملة اللي على النادي الأهلي واللي على الكابتن محمود الخطيب لأنه ما ينفعش، ولا على إمام عاشور ولا على عدد من اللاعبين”.
وزاد شوبير:” ما ينفعش أنت لحد قريب كنت تقول الكابتن خطيب ده ‘يا سعدنا هنانا كابتن خطيب معانا’، كنت طاير من الفرحة بإمام عاشور والأهداف اللي بيسجلها واللقطات اللي بيعملها وإنه بياخد أحسن لعيب في مصر سنتين. عنده أخطاء وخد عقوبات انتهت خلاص، خلي الدنيا تمشي بشكل جيد”.
واستكمل: “في أخطاء في تعاقدات، في أخطاء في نواحي حقيقي كان الأهلي ممكن يكون أفضل منها بكثير جداً إدارياً، لابد أن نعترف بهذا الأمر، لكن فجأة نخون فلان ونخون علان وفجأة على طول شغالين ضرب وقذف في ناس مهمة، ناس رموز، ناس كبيرة داخل النادي الأهلي. ناس قدّت، كابتن خطيب أدّى كلاعب وكعضو مجلس إدارة وكأمين صندوق و كنائب رئيس وكرئيس للنادي وقدم الكثير الكثير. الأهلي يعني معاه ما شاء الله دايماً كان الأهلي منور، أنا بس عشان بتكلم على الأهلي بس دلوقتي، لكن مع الخطيب زاد توهجاً”.
واكد شوبير:” آه سنة كبيسة على النادي الأهلي، سنة سخيفة على النادي الأهلي، سنة سيئة على النادي الأهلي، مفيش حد يقدر يقول غير كده، لكنه في النهاية أنت لازم تكون مساند مش الدنيا أنت ماسك، أنا بطلع وبنقد وبقول وبحكي وبقول هنا وبقول في الإذاعة وبتكلم وبقول أخبار، لكن عمري ما آخدها إن أنا أفضل أخبط في ده وأخبط في ده. لكنه رحم الله امرءاً أهدى إليّ عيوبي، ده مش عيب بالعكس تقولها، لكن فكرة إنك طول الوقت بقى عمال تخبط هنا وتخبط هنا وتبقى سعيد”.
و أسهب: “ونمرة اتنين الحقيقة، وهذا هو المطلوب من النادي الأهلي إنه حافظ على أسرارك زي ما كنت بتعمل زمان. ما ينفعش إنك تفضل واحد عن واحد وده يقول كلام وده ما يقولش كلام وده عنده خبر وده ما عندوش خبر، دي قصة صعبة، دي قصة صعبة جداً جداً وسببت جزء من الانقسام. وأنت عندك ما شاء الله من الشخصيات اللي داخل النادي واللي موجودة بتشتغل في النادي اللي يقدر يعمل ده بشكل جيد. القصة مش إن أنا ده مش عاجبني الكابتن وليد ولا مش عاجبني الكابتن رمضان ولا مش عاجبني الكابتن سيد عبد الحفيظ ولا مش عاجبني الكابتن فلان، لا، قصة اللمة اللي كانت موجودة عندك.”.
وتابع شوبير:” مش هدافع عن حد، لكن هقول كلمة حق.. النادي الأهلي النهاردة في حالة من عدم الاتزان، وده شيء وارد جداً في كورة القدم. لكن الغريب هو الهجوم الضاري والممنهج على محمود الخطيب، يا جماعة، محمود الخطيب مش مجرد رئيس نادي، ده رمز من رموز الكرة المصرية والأفريقية. لما النادي بيكسب، الكل بيبقى شريك في النجاح، ولما بيحصل إخفاق، مش عدل إننا نحمل شخص واحد المسؤولية كاملة”.
و أشار: “ الأهلي عنده أخطاء؟ طبعاً عنده أخطاء، والإدارة نفسها اعترفت بوجود أخطاء إدارية وفنية، وشغالين على تصحيحها. لكن الهجوم اللي بيوصل لمرحلة التشكيك في الذمم أو التقليل من تاريخ ناس قدمت كتير للنادي، ده اللي مرفوض تماماً”.
وأختتم:” أنا بقول للجمهور: انقدوا زي ما أنتم عايزين، حقكم تزعلوا على نتايج فريقكم، لكن بلاش ننسى الفضل والبطولات اللي اتحققت في وقت قصير جداً. الأزمة الحالية محتاجة تكاتف، مش محتاجة تقطيع في الرموز وهدم في المعبد.”
