وجه النجم الدولي السابق والإعلامي أحمد حسام “ميدو” رسالة نارية ومباشرة إلى الكابتن سيد عبد الحفيظ، عضو مجلس إدارة بالنادي الأهلي، كاشفاً عن “الفخ” الذي تسبب في إطاحته من منصبه سابقاً، ومحذراً إياه من تكرار نفس الخطأ في مستقبله الإداري داخل الأحمر.
وقال ميدو، خلال تصريحات تليفزيونية ببرنامج “أوضة اللبس”، عبر قناة “النهار”:” الحقيقة يعني لو يسمح لي الكابتن سيد عبد الحفيظ إن أنا أنصحه، الكابتن سيد عبد الحفيظ راجل طبعًا أهلاوي جدًا، وراجل بيعشق النادي الأهلي، وراجل عايز يخدم النادي الأهلي بكل ما تعنيه الكلمة، ولكن نصيحتي ليه لو يسمح لي إن أنا أنصحه.. كابتن سيد مش لازم إنت اللي تكون متصدر المشهد؛ لأن تصدرك للمشهد بيحرقك.”.
وتابع: “واحد أهم أسباب رحيلك في فترتك السابقة كمدير كورة هو إن إنت تصدرت المشهد ولوحدك. إنت راجل اللي أنا أعلمه إن إنت عندك بلان (خطة) جوه النادي الأهلي إن إنت عايز تكبر جوه النادي الأهلي، من عضو مجلس إدارة لنائب رئيس لرئيس فيما بعد.”.
وشدد ميدو:”نصيحة والله نصيحة بقولها له لأن أنا عارف كويس قوي القصة بتدار إزاي.. نصيحة للكابتن سيد عبد الحفيظ: لا تتصدر المشهد وحدك، ما تخليش حد يطلعك مسرح لوحدك، لأن في الآخر إنت أه بتخدم ناديك في حتة لكن إنت بتتحرق، أول واحد بتتحرق.”
وأشار: “”هتوصل لمرحلة إن إنت بعد انتهاء هذه الدورة، بعد تلات سنوات ونص، إن إنت موقف ورا موقف ورا موقف.. أنا متصدر المشهد. صحيح ده بيخلي الناس تسقف لي وصحيح ده بيخلي الجمهور يقول الراجل بيجيب حقنا، ولكن مع توالي المواقف إنت بتتحرق؛ مش بتتحرق قدام الجمهور، بتتحرق قدام المسؤولين.”
و أكمل ميدو: “وبتتصدر فكرة إن إنت اللي سبب المشاكل وإن إنت اللي بتختلق المشاكل، وإن إنت عدم وجودك هيخلي المشاكل تختفي. وتاني، ده كان واحد من أهم الأسباب الرئيسية اللي عجلت بقرار رحيلك من منصبك كمدير كورة في المرة الآخرانية دي، رغم إن إنت كنت عامل شغل كويس جداً من الناحية الإدارية في السيطرة على الفريق والسيطرة على أوضة اللبس وعلاقاتك باللعيبة وتعاملك مع الإعلام وكل الكلام ده.”
وأكد: “”فتاني، الكابتن سيد عبد الحفيظ بيقوم بدور مهم ولكن دور بيحرقه، وأنا عارف كويس قوي أنا بتكلم في إيه، بل إن أنا عملت الغلطة دي قبل كده مرة واتنين. ما تتصدرش المشهد لوحدك، ما تطلعش مسرح لوحدك.. صدقني السوشيال ميديا هتسقف لك والصفحات هتقول إن كابتن سيد، لكن على اللونج تيرم (المدى الطويل) إنت بتتحرق.”
وأختتم: “أظن الرسالة واضحة، وبقولها بكل أمانة للكابتن سيد عبد الحفيظ: ما تعملش الغلطة اللي إنت عملتها قبل كده، لازم الموضوع يدار بذكاء أكبر.”
شاهد:
