أكد معتمد جمال، المدير الفني لنادي الزمالك، أن الفوز ببطولة الدوري العام هذا الموسم جاء تتويجاً لجهود جماعية كبيرة من منظومة العمل داخل القلعة البيضاء، مشدداً على أن الزمالك سيظل دائماً منافساً شرساً على كافة البطولات التي يشارك فيها، رداً على المشككين في قدرة الفريق على المنافسة قبل انطلاق الموسم.
وقال جمال، خلال مداخلة هاتفية ببرنامج “ملعب أون”، عبر قناة “أون سبورت”: أنا بشكر كل الزملكاوية واللي مش زملكاوية والله أي حد كان مصدق إن احنا نقدر نعمل حاجة أنا بشكره واللي مكانش مصدق، واللي كان مستغرب، واللي كان في ناس بتقول نادي الزمالك مش هينافس على حاجة السنة دي، أنا بقول لهم بقى انتوا كنتوا غلطانين”.
و أضاف:” نادي الزمالك طول عمره هيبقى موجود، وطول عمره بينافس، وطول عمره لما تخش أي بطولة بيبقى بتلعب على البطولة. فـ أنا بحمد ربنا، الحمد لله من عند ربنا، إن احنا ننهي السنة بدوري عام “.
وشدد جمال:” بطولة صعبة جداً، يعني من أصعب البطولات اللي دخلت النادي، أنا كنت زعلان جداً على بطولة الكونفدرالية، كنت اتمنى إن هي تبقى موجودة معانا السنة دي أو تبقى زملكاوية، لكن ربنا ما أرادش كل الناس اشتغلت، كل الناس أدت أكتر من دورها كمان، إذا كان الجهاز الفني أو الجهاز الإداري أو الجهاز الطبي”.
وأشار: “يعني “جون” أنا بشكره من خلالك، تعب معانا جداً وحافظ على الفرقة ولم الفرقة وكان في ظهرنا، فـ أنا بشكر جون جداً على الدعم اللي كان دايماً واقف معانا فيه، فـ الحمد لله كان أقل حاجة نقدر نقدمها لجمهور نادي الزمالك، اللي أنا من خلالك بقول لهم: انتوا لو مش موجودين ما كناش وصلنا للي احنا وصلنا له. وإن شاء الله بطولة غالية وبطولة مهمة جداً بالنسبة لنا نبني عليها في الفترة اللي جاية “.
وواصل جمال:” أصعب لحظة عدت عليك؟ في ضربات الجزاء.. مش في ماتش الدوري، ضربات الجزاء بتاعة اتحاد العاصمة الموضوع كان صعب جداً، كان صعب جداً بالنسبة لي الجمهور ده كله يروح زعلان وأكثر حاجة حزنتني اللي احنا ما أخدناش البطولة، فـ دي كانت أقرب واحدة بالنسبة لي “.
وردا على سؤال البيت وزوجة حضرتك قالت إن أنت تقريباً ما كنتش بتنام. لو عايز تقول “الدوري في ميت عقبة”، عايز تقول الجملة دي لمين؟ أجاب:” أول حاجة أقولها لجمهور نادي الزمالك: اتطمنوا عندكم فريق إن شاء الله ينافس على البطولات مع شوية دعم إن شاء الله الفترة الجاية كتير قدام”.
وزاد جمال: “وبقول لعيلتي وأصحابي وإخواتي تعبتوا معايا، والمجهود بتاعكم الحمد لله إن احنا نجيب الدوري نرجعه نادي الزمالك وإن شاء الله أي حد هيكون موجود في نادي الزمالك هيحارب على إنه يسعد نادي الزمالك، الدوري يبدأ من ميت عقبة إن شاء الله”.
.
واستطرد:” محمد صبري، عايز تقول له ايه؟ صبري أنا بهدي له البطولة دي، دي أقل حاجة أقدمها لك يا صبري . لو كنت موجود معايا النهارده كنت هتبقى أسعد إنسان في العالم . وزي ما أنت كنت جنبي على طول، وأنا حاسس إن أنت فرحان ومبسوط، بهدي لك البطولة يا صبري ربنا يرحمك . وتبقى يعني.. كله حزن إن أنا حاسك أنت حاسس وفرحان في مكان أحسن من المكان اللي احنا موجودين فيه”.
وأكمل: “ولاد وبنات محمد صبري، دينا ورولا كانوا موجودين، ربنا يخليهم ويبارك فيهم ويحافظ عليهم ويبقوا أحسن الناس إن شاء الله”.
وأختتم:”دور عبدالله السعيد مهم جداً.. عبد الله السعيد عشرة عمري . يعني عبد الله السعيد أنا اشتغلت معاه من 2004 أو 2003 كأس العالم 2005 فـ عبد الله.. مش عايز يعني أكبره يعني، لكن عبد الله من أحسن اللعيبة في الدوري المصري”.
