وجه معتمد جمال، المدير الفني لنادي الزمالك، رسالة قوية لمن شككوا في الفارس الابيض وذلك بعد الفوز ببطولة الدوري العام، مشدداً على أن الزمالك سيظل دائماً منافساً شرساً على كافة البطولات التي يشارك فيها.
وقال جمال،خلال تصريحات تليفزيونية عبر قناة “أون سبورت”:” أنا بشكر كل الزملكاوية واللي مش زملكاوية والله أي حد كان مصدق إن احنا نقدر نعمل حاجة أنا بشكره واللي مكانش مصدق، واللي كان مستغرب، واللي كان في ناس بتقول نادي الزمالك مش هينافس على حاجة السنة دي أنا بقول لهم بقى انتوا كنتوا غلطانين “.
وأكمل:” نادي الزمالك طول عمره هيبقى موجود، وطول عمره بينافس، وطول عمره لما تخش أي بطولة بيبقى بتلعب على البطولة. فـ أنا بحمد ربنا، الحمد لله من عند ربنا، إن احنا ننهي السنة بدوري عام’.
وشدد جمال: “بطولة صعبة جداً، يعني من أصعب البطولات اللي دخلت النادي، أنا كنت زعلان جداً على بطولة الكونفدرالية، كنت اتمنى إن هي تبقى موجودة معانا السنة دي أو تبقى زملكاوية، لكن ربنا ما أرادش كل الناس اشتغلت، كل الناس أدت أكتر من دورها كمان، إذا كان الجهاز الفني أو الجهاز الإداري أو الجهاز الطبي”.
وأكد:” يعني “جون” أنا بشكره من خلالك، تعب معانا جداً وحافظ على الفرقة ولم الفرقة وكان في ظهرنا، فـ أنا بشكر جون جداً على الدعم اللي كان دايماً واقف معانا فيه”.
وتابع جمال: “فـ الحمد لله كان أقل حاجة نقدر نقدمها لجمهور نادي الزمالك، اللي أنا من خلالك بقول لهم: انتوا لو مش موجودين ما كناش وصلنا للي احنا وصلنا له. وإن شاء الله بطولة غالية وبطولة مهمة جداً بالنسبة لنا نبني عليها في الفترة اللي جاية”.
وبشأن أصعب لحظة عدت عليه؟ أشار:” في ضربات الجزاء.. مش في ماتش الدوري، ضربات الجزاء بتاعة اتحاد العاصمة الموضوع كان صعب جداً، كان صعب جداً بالنسبة لي الجمهور ده كله يروح زعلان وأكثر حاجة حزنتني اللي احنا ما أخدناش البطولة، فـ دي كانت أقرب واحدة بالنسبة لي”
وأختتم:” أمنياتي الفترة اللي جاية مع نادي الزمالك؟ اتمنى الاستقرار لنادي الزمالك، واتمنى إن نادي الزمالك يفضل في مكانه؛ هي دي مكانة نادي الزمالك الطبيعية قليل والله العظيم نادي الزمالك ده حاجة كبيرة جداً، وإذا كنا احنا موجودين أو مش موجودين نادي الزمالك طول عمره هيفضل كبير وطول عمره هيفضل كبير بجمهوره وبلعيبته، وكل الناس أو أي حد بينتمي لنادي الزمالك ده شرف تيشرت نادي الزمالك ده يساعد أي حد على النجاح . فـ بتمنى لنادي الزمالك مزيد من الاستقرار ومزيد من البطولات لأن نادي الزمالك يستاهل أكثر من كده بكثير “.
