شنّ النجم الدولي السابق والإعلامي أحمد حسام (ميدو) هجوماً عنيفاً وغير مسبوق على الجهاز الفني لنادي الزمالك بقيادة الكابتن معتمد جمال، وعلى لاعبي الفريق، عقب خسارة لقب بطولة كأس الكونفدرالية الأفريقية على ملعبهم ووسط حضور جماهيري غفير.
وقال ميدو، خلال تصريحات تليفزيونية ببرنامج “أوضة اللبس”، عبر قناة” النهار”:” الزمالك خسر الكونفدرالية على ملعبه وسط 60 الف من جمهور دعم بشكل كبير جدا، الزمالك احرز هدف مبكر في اول 4 دقايق، وفرحه كبيره وكان في شعور بالعودة للبطولة وحس ان ربنا رجع لك حقك بعد الظلم في لقاء الذهاب، وتتساوى في النتيجه، وعندك 85 دقيقه في ملعبك ووسط جمهور ودعم كبير، وفريق نازل متماسك والهدف المبكر اربكهم، وبدل الزمالك ما يضغط ويستغل التقدم كابتن معتمد جمال واللاعبين قرروا يسيبوا الكرة لاتحاد العاصمة”.
وتابع:” وللآن مفيش زملكاوي ولا انا عارفين ليه كابتن معتمد رجع نصف ملعبه وساب الكرة لاتحاد العاصمة اللي مكنش مصدق هو ومدير هالفني ان الزمالك. ساب الاستحواذ لهم، وكأنك بتقول انتم قلقانين ليه خشوا معايا الجيم”.
وشدد ميدو: “تخيلوا ان جمهور الزمالك من اول الدقيقه 5 مستني سيناريوهين لاما يدخل فيه جول او يلعب ضربات جزاء، في مشهد اول مرة يعملها الزمالك في تاريخه ولا عمري شوفت الفريق بيلعب بهذا الجبن والتوتر، توتر غير طبيعي وغير مقبول ان لاعبي الزمالك بيلعبوا كرات طويلة، ومعندوش حلول ولاهو معه الكرة ولا هو مش معه الكرة”.
وواصل:” عاوز ادخل جوه مخ كابتن معتمد علشان اعرف عمل ليه كده، خلينا نقول ان خاف ان لعيبته ان ميبقاش عندها الطاقه علشان تضغط ضغط عالي وان معندوش دكه قويه يقدروا ينزلوا يعوضوا
هل ترك الاستحواذ للمنافس ينفع بـ3 لعيبه في وسط الملعب ميعرفوش يقطعوا الكره ومنهم آدمم كايد، والفرق الكبيره متعملش كده جماهير الزمالك طالبت اللعيبه بالضغط خلال الشوط التاني”.
و أكمل ميدو: “هل يعقل ان الزمالك بيلعب على ملعبه ونسبه الاستحواذ اكبر للمنافس، انت قدمت لهم البطولة على طبق من فضه، جماهير الزمالك خارجه زعلانه ومدلدله وزعلانه من شكل الفريق دي احصائيات فريق بيلعب على ارضه ووسط جمهوره وجمهور اسود”.
و أردف:” انت لغيتوا شخصية الزمالك وانا بكلم بلسان المشجع وعمري ماهجامل حد على حساب الزمالك، حد يقولي التوقيت مفيش توقيت، الزمالك من اول ماتش انبي في قرارات فنيه غلط ومحدش بيراجع كابتن معتمد فيها كل اللعيبه في ماتش انبي وبتفكر في الاهلي ودخلت فيه مضغوط واتغلبت سكور”.
و أكد ميدو:” لاعبي الزمالك لازم يفهموا انهم يلعبون في نادي كبير ولو مش عارفين كده تبقى مشكله كبيره، اي لاعب في الدوري يتمنى يلعب في الزمالك وامام الجمهور ده، الجمهور عمل كل حاجه واحسن داخله في تاريخ الكرة المصريه واقل حاجه تعملها لهم تموت نفسك وتطلع بالدم من الملعب اللاعب اللي خايف ومتوتر ميستحقش يلعب في فريق كبير”.
وزاد: “خلينا نقول مفيش تعليمات من المدرب فين اللعيبه الكبار اللي يقولوا نقرب لبعض ونلعب وانا اللي حاسس بالفريق وعارف ايه يتعمل، وفي وقت شايف الامور مش ماشيه نعدلها، اتحاد العاصمة مبيعرفوش يطلعوا بالكره تحت ضغط اسيب لهم انا الملعب،كنت متوقع اكتر من لاعب يضيعوا”.
واختتم:” تاني وكلام بدون تزويق ومجاملة وبدون ظلم لحد بحق ربنا كابتن معتمد جمال واللاعبين اهدوا الكونفدرالية لاتحاد العاصمة على طبق من فضه وشكرا”.
