انتقد الإعلامي مهيب عبد الهادي أداء الأهلي رغم الفوز، ووصفه بالصعب وغير المقنع، خلال ظهوره في برنامج «اللعيب» على قناة «MBC مصر». وقال: «النهارده شفنا الأهلي بيحقق فوز جديد في الدوري، فوز صعب وغير مقنع.. وغير مقنع كالعادة، زي ما متعودين من النادي الأهلي الموسم ده!».
وأضاف: «الأهلي الموسم ده غير مقنع، لكنه بيفوز مع عموتة. الموضوع ده هيستمر كتير؟ الله أعلم. والصبر على عموتة هيستمر كتير؟ الله أعلم». ورأى أن مواجهة الأهلي وبيراميدز ستكون حاسمة، مرددًا: «مين اللي يقدر على بيراميدز؟ مين اللي يقدر على بيراميدز؟ 8 انتصارات متتالية في الدوري المصري!».
بيراميدز يفرض التحدي
وتحدث عبد الهادي عن سلسلة انتصارات بيراميدز، قائلًا: «أعتقد إن محدش حقق الرقم ده من فترة، إنك تلعب أول 8 ماتشات وتكسبهم، يعني 8 في 3 بـ24 نقطة! حاجة محصلتش لا من الأهلي ولا من الزمالك في الفترات اللي فاتت».
وقارن بين الأهلي والزمالك أمام بيراميدز، مضيفًا: «الزمالك كان قادر على بيراميدز الموسم اللي فات، لكن الأهلي مقدرش على بيراميدز»، ثم قال: «الواضح إن بيراميدز اتعلم الدرس كويس أوي، وإنه ما يفرطش في نقاط سهلة».
مصطفى شوبير وحديث رحيل عموتة
ورأى مهيب أن مصطفى شوبير أنقذ الأهلي من فتح ملف مستقبل المدرب، قائلًا: «النهارده مصطفى شوبير أنقذ النادي الأهلي رغم إن لو مكنش أنقذ الفريق، كنا زماننا دلوقتي بنتكلم في سكة: عموتة قاعد ولا ماشي؟ ماشي ولا قاعد؟».
وانتقد تكرار الحديث عن مصير المدير الفني بعد عدد قليل من المباريات، وقال: «بقالنا في الكلام ده من أيام كولر من 3 سنين، من 2023، وأي مدير فني بييجي بنبدأ نتكلم عن عداد وعمر المدير الفني من بعد تالت أو رابع مباراة!» وأضاف: «بس ده مش الأهلي اللي إحنا عارفينه على فكرة. النادي الأهلي، يعني مفيش فرقة مش محتاجة مدير فني، لكن عنده لعيبة تقدر تلعب وتقدر تطلع أكتر من كده».
رسالة طمأنة لجماهير الأهلي
وفي المقابل، طمأن عبد الهادي جماهير الأهلي، قائلًا: «وأنا بطمن جماهير النادي الأهلي: ما تقلقوش على النادي الأهلي بجد». وأضاف أن «فيه حاجات بتتظبط من جوه» وتحديثات «سواء في السياسة أو في الجينات أو في حاجات كتير جدًا، وحتى في نوعية اللعيبة»، لافتًا إلى أن هذا العمل يحتاج وقتًا، مثلما يحدث مع اللاعبين الناشئين.
وتناول المقارنة بين نتائج الأهلي والزمالك، قائلًا: «يبقى الأهلي غير مقنع، وفي نفس الوقت الزمالك بيفوز! إحنا ما اتكلمناش على الزمالك عن الأداء، كلمني على النتائج»، ثم تساءل: «الله! طب ما بتقولش كده ليه في النادي الأهلي؟».
وأوضح أن الأهلي، بحسب رأيه، لا يواجه النوع نفسه من الأزمات، وقال: «لأن النادي الأهلي معندوش مشاكل من النوع ده؛ لعيبته بتاخد مستحقاتها، ومش عايز أقول إن الأمور ماشية من غير أي مشاكل، لكن مش عندك نفس النوع من الأزمات اللي ممكن تحصل في أندية تانية». وأضاف: «الزمالك مش عنده لعيبة بتقولك: لأ، أنا عايز بدل الـ40 مليون 50، وبدل الـ50 مليون 60، وبدل الـ60 مليون 70! ده مش بيحصل بالشكل ده».
كما أشار إلى إدخال عناصر شابة، قائلًا: «وهتبتدي تدخل شباب زي محمد عبد الناصر، اللي تم التعاقد معاه في النادي الأهلي في يناير، لأن فيه حاجات بتحصل والنادي الأهلي دايمًا مش واقف مكانه!».
