كشف الإعلامي أحمد شوبير، عن كواليس هامة تخص إمام عاشور، لاعب خط وسط النادي الأهلي، حاسمًا الجدل حول حقيقة تلقيه عرضًا احترافيًا ضخمًا، وموضحًا طبيعة الإصابة التي يعاني منها مؤخرًا.
وقال شوبير،خلال تصريحات تليفزيونية عبر برنامج” الناظر “على قناة” النهار”:” من أحد الدوائر المقربة جدا جدا لإمام عاشور النهارده حصل حوار مطول وانا دائما مبحبش أقول حاجه غير من مصادرها
لان حصل عتاب من بعض الناس إني قولت ما تردد عن وصول عرض لإمام عاشور مليون دولار قبل التجديد غير صحيح”.
وتابع:” وتأكدت مرة ثانية وفعلا مفيش عرض لا 7.5 ولا 8 مليون كان موجود لامام عاشور وده دورنا أننا نجيب المعلومة الصحيحة للمشاهد وساعات نصيب ونخطأ عادي يعني ده لا تكذيب ولا ذم في أي حد”.
وشدد شوبير: “امام عاشور زعلان وحاسس ان فيه حملة عنيفة عليه وانه متداس عليه أوي الفترة اللي فاتت، واتقالي من الدائرة المقربة منه انه من ساعة المنتخب عنده مشكلة في العضلة الضامة وبيلعب بحقن مسكنة والقصة دي عملتله تليف في العضلة الضامة، وبتأثر على مجهوده، ومبيقدرش يسدد ويجري ويعمل اسبرنتات بأريحية، لكن أنا بشكل شخصي شايف انه مكسل”.
وواصل:” أنا بقول لإمام عاشور اللي في الكورة قليل، مش كتير، يا سيدي هتلعب 10 سنين كمان، قليلين، انا مقتنع انك مصاب لإني سألت حد من الجهاز الطبي وقال بالفعل عنده اصابة، لكن إمام بيقدر يسحتمل”.
و أضاف شوبير:” وهي جاتله من عند ربنا الراحة أو الاستبعاد رغم اني ما علمته ان إمام بقاله 3 ايام أحسن لاعب في تدريب الأهلي، احسن واحد بمعنى احسن واحد يعني، ولو كمل بنفس الشكل متقلقش على إمام عاشور، والقعدة في آخر فترة دي في مصلحة إمام”.
وأكمل:” احنا كمان عندنا شريف عبدالمنعم كان لعيب جامد اوي وكان موده في كل ماتش يحدد هنعمل ايه وكان لعيب اوي لحد ما عمل حادثه وبطل كورة بدري وخسر كتير”.
وأختتم:” بقول له يا إمام أنت عقدك 5 سنين كان 2 ومددت كمان 3 استغل شهرة وشعبية الأهلي وامكانياتك لمصلحة الأهلي ومنتخب مصر، مفيش خلاف إنك حاجة عظيمة بس خلي الكورة هي رقم واحد في حياتك، كل الحاجات التانية موجودة بعد ما تبطل كرة، هيبقى قدامك 30 سنة تعمل فيهم كل حاجة مش وحشة”.
