أثار الكابتن إكرامي الشحات، نجم النادي الأهلي ومنتخب مصر الأسبق، حالة من الجدل بتصريحات قوية تعليقاً على حديث الكابتن حسن شحاتة بشأن صلاحيات المدير الفني، كما وضع يده على علامات استفهام عديدة تخص كواليس رحيل حسام حسن عن تدريب الفراعنة، وأزمة أغنية اللاعبين في المعسكر.
الرد على حسن شحاتة وحدود صلاحيات المدرب
وعقّب إكرامي الشحات على تصريحات “المعلم” بشأن تعامل المدير الفني مع اللاعبين قائلاً: “طبعاً الكابتن حسن قال إن المدير الفني في أوضة اللبس ليه يعمل ما بدا له بالنسبة لتوجيه اللاعبين، لكن ما يبقاش فيها نوع من قلة الأدب، ما يبقاش فيها تجاوز، أركنهم وأعمل اللي أنا عايزه لكن في إطار الاحترام ما بين المدرب وما بين اللاعيب”.
“حلقة مفقودة” في رحيل حسام حسن
وانتقل “وحش أفريقيا” للحديث عن لغز إقالة حسام حسن بعد تجديد عقده، موجهاً حديثه للإعلامي مهيب عبد الهادي: “نرجع بقى لموضوع حسام حسن وإقالة حسام حسن؛ هرجع بيك بالذاكرة شوية للحلقة اللي فاتت لما كنت بتسألني على إن المهندس هاني أبو ريدة يسافر تركيا ولا ما يسافرش، وقلت لي إنه سافر يلطف الأجواء ما بين محمد صلاح وما بين حسام حسن”.
وأضاف متسائلاً باستغراب: “طب بعد كأس العالم وبعد ما الكابتن حسن قال إن المشاكل العائلية والكلام ده، طب إنت جددت له بعديها ليه؟ ما تريثتش شوية ليه؟ معنى إن إنت تجدد له يعني معنى كده إن إنت مقتنع بيه إنه يكمل، وبعدين تيجي تقيله أو توجه له الشكر! يبقى في حلقة مفقودة في الموضوع دوت”.
مطالبة اتحاد الكرة بالمصداقية
وطالب إكرامي مسؤولي الجبلاية بالخروج وتوضيح الحقائق للجمهور لوقف الشائعات، قائلاً: “نفسي يطلع مسؤول في اتحاد الكورة يقول إيه سبب إقالة حسام حسن، هل هي فنية ولا عائلية ولا إيه؟ لازم الناس كلها تبقى عارفة عشان المصداقية، بدل ما كل واحد طالع يقول حاجة، يقول لك محمد صلاح اللي مشّى حسام حسن، لا اللعيبة اللي مشّت حسام حسن”.
أزمة أغنية اللاعبين في المعسكر
واختتم إكرامي تصريحاته بالتوقف عند واقعة غناء لاعبي المنتخب في المعسكر، مبدياً استياءه منها: “وفي جزئية كمان مهمة جداً يا مهيب أنا وقفت عندها، الأغنية اللي اللعيبة غنتها في المعسكر، إيه المقصود بيها؟ هل المقصود بيها حسام حسن ولا دي فرحة بالنسبة للعيبة في المعسكر؟ يعني فعلاً كانت حاجة أنا شايف إنها ما كانتش حاجة كويسة”
