حكى الكابتن محمود أبو رجيلة أسطورة نادي الزمالك عن كواليس ذكرياته مع حلمي زامورا أسطورة الزمالك الراحل، مشيرًا إلي النادي خيره على الجميع
وقال ” أبو رجيلة” : ” كابتن حلمي زامورا له ذكرى معنا وكل واحد من جلينا له ذكرى وهو العمود الاساسي للزمالك ومهما اتكلمت عليه صعب اديله حقه لانه له صولات وجولات وغصب عنك لما كان بيدخل النادي واحنا قاعدين ضربات قلبك بتزيد”.
وأشار :” كان له رؤيه جيده للناشئين وكان بيطلع كل سنة 5 أو 6 للفريق الأول وهو اللي شغلني عند ابورجيله وخطبلي كمان وبالنسبة لي حاجة كبيرة أوي وكنت ساعات اروح اجيبه من البيت علشان مكنش عنده عربية”.
وأضاف ” أبو رجيلة” خلال تصريحات عبر قناة ” الزمالك” : ” كابتن محمد حسن حلمي زامورا بجد لجد قيمة كبيرة مش انا بس اتكلم عليه أي رئيس نادي جه وهو موجود ساعده وكان بيعرف كل حاجة وكان مهندس زارعي وبيحضر التمرين “.
وتابع :” كان له بصمات كبيرة على جيلنا والجيل السابق أحمد رفعت وعبده نصحي ونبيل نصير وحمادة إمام و رفاعي وأحمد مصطفى”.
وواصل :” أبو رجيلة” :”الزمالك كان في نجوم كبيره جدا وكان حلمي زامورا استاذ في الطاوله نجيب المستكاوي كان بيجي يتغلب ويمشي وكان بيخسر من السادات ده السادات يابني”.
وأكمل :”احنا من زمان ربنا راضنا وربنا وسع علينا ودخل لبيوتنا فلوس من الزمالك جوزت ولادي في الزمالك واتجوزت فيه والزمالك حاجه كبيره اووي ياريت نقدر نحسب اللي اخدناه منه ونقدر نوفي حقه علينا”.
واستطرد :” أنا عندي كل الخير اللي انا فيه بفضل ربنا والزمالك وتعبت علشانه واسم الزمالك كبير وكنت باخد من الزمالك 800 ولما روحت السعودية كنت باخد 26 ألف بفضل الزمالك واسمه شهادة مش أي حد ياخدها”.
وحكى “أبو رجيلة” :” كابتن حلمي كان يقولنا متكلموش ف الفلوس وكان بيديني 10 جنيه ويقول متقولوش لحد، ولما جه ياخد كوارشي من الإمارات وكنت بدرب هناك وعملت له عزومة كبيرة ووديته الفندق قالي تعالى وديني المطار قالي بتاخد كام قولتله 16 الف قالي متحددش وتعالى اشتغل في الزمالك وجيت اشتغلت في الزمالك سنة 84 واخدنا الدوري وإفريقيا”.
وأكد :” انا مش متشائم وحبينا الزمالك وارتبطنا بالهتاف يازمالك يامدرسة لعب فن وهندسه والأداء اهم عندنا”.
وعن مستوى فريق الزمالك الحالي أوضح :”مش خايف على الزمالك عنده فريق أساسي في الملعب واخر قاعد بره وبيقدم أعلى مستوى ممكن يحصل تعثرات زي امبارح ومعلش والزمالك ياخده مركزه الحقيقي الفني”.
