أشاد الدكتور كمال درويش، رئيس نادي الزمالك الأسبق، بالنهج الذي يتبعه مجلس الإدارة الحالي، مؤكداً أن “السياسة المتبعة في تقليل التصريحات الإعلامية والابتعاد عن الأضواء” أحدثت فارقاً جوهرياً في استقرار الفريق.
وقال درويش،خلال مداخلة هاتفية عبر برنامج “اللعيب “على قناة” ام بي سي مصر”:” إن شاء الله الفريق يكمل المشوار بعد الفوز على بيراميدز، لأن اللعيبة لعبت بروح الزمالك وبقوا حافظين بعض كويس جدًا، وده ظهر في الأداء والنتيجة”.
و أكمل:” أهم حاجة عملها مجلس الإدارة إنه بطل كلام، وده عمل فارق كبير جدًا، مفيش كلام كتير ولا تصريحات، هدوء كامل في الإدارة، وده انعكس بشكل واضح على الفريق، ويمكن اللي بيتابع الأمور بشكل مباشر هو كابتن هشام نصر”.
وشدد درويش:” الزمالك بيلعب باسمه وجمهوره، والجمهور هو السند الحقيقي، هل معقول الجمهور بالشكل ده كل ماتش؟ رغم كل الظروف الصعبة، لكن مكملين ورا النادي لأنهم الوتد الحقيقي”.
وواصل:” بحيي تجربة جون إدوارد، وكانت المفروض تتطبق من بدري، لأننا متأخرين فيها شوية، وجوده مهم لكن واضح إنه ما لعبش كورة، فلازم يبقى معاه حد فاهم يوجهه فنيًا”.
وزاد درويش:” ممدوح عباس راجل مخلص للزمالك، والنادي حياته، ودايمًا بيدعم، سواء بحل أزمات أو بمساندة اللعيبة، وفي كل الأحوال هو ركيزة أساسية في دعم النادي”.
وأكد:” بالنسبة لسؤال إيه اللي ناقص الزمالك عشان يستقر؟ لازم نمشي بالطريق الصح في إدارة النادي، وفقًا لاقتصاد الدولة، لأن محدش هيديلك حاجة جاهزة”.
واستطرد درويش:” الدولة أصدرت قانون لإنشاء شركات لإدارة الأندية، ولازم نشتغل بالشكل ده، ويبقى في أجهزة فنية وإدارية تدير الكرة بشكل احترافي، فكرة إن عندك 24 لعبة كلهم محترفين وبتصرف عليهم بنفس الشكل ده مش هتنفع، النادي كده ممكن يفلس، لازم الوضع يتحول لاستثمار حقيقي”.
و أختتم:” لازم يبقى في أرباح، لأن دي الطريقة الوحيدة اللي تضمن استقرار واستمرار النادي بشكل سليم على المدى الطويل”.
