إسلام الشاطر: إمام عاشور لو كان شارك أمام بيراميدز أساسيًا كان الأهلي سيخسر بخماسية! فيديو

فتح إسلام الشاطر، لاعب الأهلي السابق، ملف الأزمات داخل الفريق الأحمر، موجّهًا انتقادات لاذعة للإدارة والجهاز الفني وبعض اللاعبين، على خلفية تراجع الأداء والنتائج، مؤكدًا أن هناك أخطاء متراكمة داخل النادي تحتاج إلى وقفة حاسمة وتصحيح سريع.

وقال إسلام الشاطر: “الأهلي عنده خلل إداري وفني واضح جدًا… وأنا قاصد أقول إداري لأن القرارات غلط جوه النادي بقالها سنتين تقريبًا”.

وتابع: “عايز أوجه رسالة لإمام عاشور؛ إمام لعيب جامد ومن أحسن لاعيبة مصر، بس بقالك فترة وحش وبتخسر النادي الأهلي… إنت بتلعب في الأهلي، يعني إيه؟ يعني لما تيجي تنزل مينفعش تقلب وشك عشان تقول للناس إنك متضايق وزعلان إنك مبدأتش الماتش”.

وأكد: “لو إمام عاشور كان نزل بدري كنا ممكن نتغلب خمسة، مع احترامي ليه أنا بحبه وكنت دايمًا بشيد بيه… من حقك تزعل آه، كلكم نجوم كبار وعارفين ده، بس زعلك يبقى في الملعب، في الربع ساعة اللي هتنزلهم تعمل فيهم حاجة، مش بالشكل اللي لعبت بيه ده… مفيش باصة صح!”.

وشدد: “بس بعيد عن إمام، أنا اتضايقت من الكلام عليه، لكن في خلل إداري واضح… أنا قلت قبل كده اللي عمل التلات عقود دول راجل فاشل! والناس هاجمتني، بس أنا مش بهاجم حد، أنا بنتقد الغلط، وكلهم ناس محترمة على دماغنا”.

وأضاف: “هو في كده؟ مدرب يبدأ بمحمد شريف في ماتش مهم وهو بقاله فترة كبيرة قوي مش بيلعب؟ أجيبه من آخر الطابور وأحطه في أوله وأقوله وريني نفسك؟!”.

واستكمل: “المشكلة إن الأهلي مفيهوش رأس حربة! ومش قادر يجيب… تخيل إني دافع 400 ألف دولار في لاعب ومش بيلعب! مين اللي بيحاسب؟ مفيش رأس حربة، وجايب واحد وحاطه بره خمس ماتشات… ده اسمه إيه؟!”.