أثار الإعلامي أحمد شوبير حالة من الجدل الواسع في الوسط الرياضي، عقب تصريحاته الأخيرة عبر برنامج “الناظر” على قناة النهار، والتي تضمنت رسائل غامضة ومشفرة وجهها لبعض الأشخاص دون تسميتهم، واصفاً إياهم بـ “الكومبارس”.
وقال شوبير، خلال تصريحات تليفزيونية عبر برنامج” الناظر “، على قناة” النهار”: “من حقي أكون أهلاوي وأشجع فريقي، ومن حق الجميع يكون مؤدب على السوشيال ميديا”.
و أردف:” في الفترة الأخيرة بعض الناس كأنهم مش مصدقين إن ممكن حد ياخد بطولة، وده شأنك أنت، لكن أنا كأهلاوي دايماً بصدق في فريقي حتى لو بعيد، وحتى لو ما خدش البطولة بيكون أمر عارض وعادي بيحصل، لأنه عارف انتصاراته وإنها مجرد كبوة وهيرجع ياخد البطولات”
وشدد شوبير:” لكن عمري ما أجرح في الزمالك أو أي فريق تاني، أنا أنتقد فريقي وأرمي السنة ورا ضهري، لكن أجرح في المنافس ليه؟ مفيش ما يدعو لكده”
وواصل:” لما الكلام يطلع من ناس كبيرة، لازم نبقى فاهمين إن ربنا خلقنا درجات وطبقات ومقسم الأرزاق، وفيه بطل وفيه كومبارس، وكلامي على الأشخاص مش الأندية، علشان محدش يفهم غلط لانه الحياة مينفعش الكومبارس يبقى بطل”
و أشار شوبير: “الكومبارس يفضل كومبارس، وفيه كومبارسات اتحولت لنجوم، وفيه ناس بتفضل زي ما هي، زي في التمثيل كده، ما ينفعش كومبارس يقارن نفسه بـ عادل إمام أو نور الشريف، مهما كتب يفضل كومبارس، لكن لما نجم أو بطل يتكلم كلامه بيأثر فيك سواء تضحك أو تضايق”.
و أختتم:” فيه ناس بتركب الموجة وبتلقح كلام، وأسهل حاجة إنك تلقح، لكن من حقي أشجع فريقي بدون تجريح وباحترام شديد، اللي حاصل دلوقتي حالة هلع وعدم تصديق، والناس بترمي تعليقات وخلاص”.
