أثار الإعلامي مدحت شلبي الجدل حول ما تردد مؤخراً بشأن وجود مكالمة مسربة لمعد في قناة “مودرن” مع عضو مجلس إدارة بالنادي الأهلي، تضمنت إشارات لـ “تهميش” دور محمود الخطيب.
وقال شلبي، خلال تصريحات تليفزيونية ببرنامج “يا مساء الأنوار”، عبر قناة “mbc مصر 2″:” الحقيقة عندي كالعادة بنحب نتكلم في الموضوعات المثارة على الساحة الرياضية وبنقول رأينا فيها. اليومين اللي فاتوا دول الحقيقة في زوبعة كبيرة قوي قوي نتيجة قيل إن هناك مكالمة مسجلة -وفقاً للكلام اللي بيتم تداوله يعني- ما بين أحد السادة الزملاء في الإعداد في قناة مودرن وعضو مجلس إدارة من النادي الأهلي”.
وتابع:” والكلام اللي اتقال إن عضو مجلس الإدارة بيقول إنه بيتم “تهميش” الكابتن الكبير محمود الخطيب، أو هذا المعنى يعني، ده الكلام اللي بيتردد. قبل ما أقول رأيي، الحقيقة إذا بالفعل هناك مكالمة بهذا الشكل، فإذا اتقالت بصياغة تقلل من شأن الكابتن الكبير محمود الخطيب فده عيب، ده عيب كبير جداً جداً، لأنه لا يصح على الإطلاق التقليل من قيمة وقامة زي الكابتن الخطيب طبعاً”.
وشدد شلبي: “ده إذا صح الكلام، ولكن الكلام ممكن يتقال بطريقة مختلفة وهنوصل لنفس المعنى، ربما عضو المجلس ده -إذا فعلاً كان تحدث- كان يقصد هذا، لكن كلمة “تهميش” دي، سواء منه أو من صديقنا في الإعداد الناحية التانية هو اللي قال الكلمة دي، هي كلمة لا تصح، ليه؟ “.
وواصل:” أنا قلت في 25 مارس، يعني تقريباً من شهر، قلت من وجهة نظري هناك بعض الدروس المستفادة بعد طبعاً مجموعة الإخفاقات اللي حصلت، خاصة طبعاً باللاعبين اللي جُم في النادي الأهلي والمرتبات اللي اتدفعت والمدربين والكلام ده كله”.
و أردف شلبي:” قلت أنا الكلام ده وقتها، قلت مجموعة من الدروس بنحاول إننا نساهم بيها في الرأي العام بشكل عام لكل الأندية يعني، فتحدثت عن موضوع مجلس الإدارة، وهنا أنا ما خصتش النادي الأهلي، أنا قلت في كلامي “أي مجلس”.
واشار:” خليني أسمعكم حتة صغيرة قوي لمدة دقيقة أنا قلت إيه عشان أرجع أفسر لكم المكالمة اللي ذاعت دي إذا كانت بالفعل حدثت. خليني أفكركم أنا قلت إيه: “عمل مجالس الإدارات هو عمل مؤسسي، يعني إيه؟ يعني أعضاء مجلس الإدارة دول واخدين أصوات الجمعية العمومية، وبالتالي لابد أنو يكون أي مجلس قادر من خلال كل أعضائه. وبالتالي من الممكن جداً أن يكون هناك اختلاف على ترابيزة المجلس، وهذه ظاهرة صحية مهياش عيب. ناخد القرار بالإجماع أوكي، ناخده بالأغلبية أوكي، ولكن عندما يؤخذ القرار يخرج الجميع داعماً لهذا القرار”.
وأكمل شلبي:” لكن مسألة إنه عضو مجلس الإدارة يقعد على الكرسي صامتاً عشان يبصم وياخد في نفس الوقت الواجهة الاجتماعية ورئاسة البعثات الرياضية وغيرها، هذا أمر لا يليق بأي إنسان يحترم نفسه ويحترم شخصه”.
وزاد: “طيب الكلام اللي أنتم سمعتوه ده ينطبق على الوضع اللي شغال دلوقتي ليه؟ ببساطة شديدة جداً، ربما أيقن أعضاء مجلس الإدارة أنهم مسؤولون عن القرارات التي تصدر عن مجلسهم، ربما ده ما كانش موجود قبل كده، أنا بقول “ربما”.
و استطرد شلبي:’ وبالتالي أصبح الكابتن محمود الخطيب رئيس النادي صوتاً ضمن الأصوات، هو مرجح في حالة تساوي الأصوات يمين وشمال. يعني لو حطينا قرار والمجلس ده 8؛ 4 ضد القرار و4 مع القرار يعني تساووا، هنا صوت رئيس النادي يرجح”.
و أضاف:” لو مع الأربعة دول يبقى الرأي هيمشي كده، لكن لو أربعة معاهم حتى رئيس النادي أمام خمسة معهمش رئيس النادي، إذاً الخمسة هم اللي رأيهم يمشي. إذاً لا تهميش ولا حاجة على الإطلاق، لكن بدأ المجلس يمارس مهامه بشكل طبيعي ومؤسسي، ده اللي أنا قلته من شهر”.
وأستأنف شلبي: “اللي بيحصل دلوقتي حاجة مش جديدة، كل ما في الأمر إن المجلس ربما أيقن إن بقى له دور حقيقي مع رئيس النادي وهذا مش ضد الكابتن محمود على الإطلاق، بالعكس ده أنت هنا بترسي قيمة محترمة جداً، والكابتن الخطيب المفروض ما يزعلش من ده على الإطلاق”.
وأكد:” كل ده أنا بفترض إن المكالمة ما حصلتش، لكن ما كانش صح كلمة “تهميش” دي تتقال، لا ما تتقالش على الكابتن الخطيب ولا على غير الكابتن الخطيب، لكن تتقال ببساطة إن المجلس يناقش القرارات وربما ما تكونش الأغلبية مع رئيس النادي أياً كان بقى كابتن خطيب، كابتن حسين لبيب، أياً كان رئيس النادي ده مين”.
و استكمل شلبي:” هذا هو المعنى اللي كان يجب يوصل ببساطة شديدة جداً وبدون تجريح وبدون إسقاطات، وما نعملش من الحبة قبة على الفاضي، موضوع بسيط جداً جداً لقد انخرط المجلس في القرارات، ممكن جداً كابتن الخطيب ومعاه مجموعة ترجح كلامه، يمشي مع المجموعة وهنا مش هنقول كلام رئيس النادي، هنقول الأغلبية وافقت، زي ما أنا قلت بالظبط من شهر.”.
وأختتم:” لو حصل رئيس النادي مع الأقلية وهناك أغلبية من رأي آخر، الأغلبية تمشي، وده عايز أقول يزيد من قيمة وقدر رئيس النادي ما يقللش منه على الإطلاق. لكن لا يجب على الإطلاق أن نستخدم ألفاظ تقلل من شأن قامات كبيرة، ده في رأيي ما يصحش على الإطلاق”.
