أشاد أسطورة التدريب المصرية، الكابتن حسن شحاتة، بالنتائج والمستويات التي يقدمها نادي الزمالك تحت قيادة المدير الفني معتمد جمال، مؤكداً أن نجاحات المدرب الوطني تثبت دائماً جدارته بالتواجد على رأس القيادة الفنية للأندية الكبرى والمنتخبات.
معتمد جمال.. امتداد لـ “المعلم”
وقال شحاتة في حديثه مع الإعلامي أحمد حسام “ميدو”، ردا على سؤال رأيك في الأداء اللي بيقدمه الزمالك مع معتمد جمال؟:” معتمد جمال زي ما بيقولوا إيه.. واخد من تاريخي شوية يعني. إن هو راجل مسك نادي الزمالك في ظروف مش كويسة، في ظروف صعبة، وربنا كرمه وحقق اللي ما يتحققش لسه”.
و أضاف: “وهو اللي ما يتحققش وهو إن إحنا ناخد الدوري إن شاء الله. فعشان كدة بقولك إن معتمد جمال هو أساساً ولد برضه -أنا مش هشبهه بنفسي- لكن هو ولد يعرف ربنا كويس، ماشي كويس مع اللعيبة، بيأدي أداء كويس، وبالتالي ربنا بيديله. فعشان كدة إحنا هنسيبه لغاية ما ربنا يكرمه مرة واحدة وبعدين نفتحله المواضيع أو نفتحله الباب على وسعه، بسبب هدوءه، بسبب إيمانه بربنا سبحانه وتعالى، بحاجات كتيرة جداً تقدر تحطها في معتمد جمال”.
وواصل شحاتة:” الناس بتتكلم دايماً على المدرب الأجنبي والمدرب الأجنبي، لكن إحنا التاريخ بيقولنا إن إنجازات المنتخب المصري كلها للمدربين المصريين. وفي الزمالك دلوقتي طبعاً معتمد من ولاد النادي وراجل حافظ نادي الزمالك، وراجل اشتغل مع مدربين كبار واشتغل كلاعيبة وكمدرب. النهاردة بنشوف إن المدرب المصري في الدوري المصري بيتفوق على المدرب الأجنبي بشكل كبير. المدرب الأجنبي عشان تجيب مدرب أجنبي، ماتجيبش مدرب أجنبي “أي كلام” وتقول إن أنا جبت واحد أجنبي”.
وأكمل: “حتة إن أنا جبت واحد أجنبي ديت خلاص بقى عاوزين نخلص منها، والله عاوزين نخلص منها. لما تيجي تشوف معتمد جمال وغير معتمد جمال، تشوف عندك “سيراميكا” عندك علي ماهر، وعندك هنا وهنا، الرمادي.. أيمن رمادي. يعني أنا مش عاوز أذكر أسماء وأنسى أسماء، فعشان كدة بقول إن إحنا المصريين بإمكانياتهم البسيطة، بإمكانيات مرتباتهم اللي هو يعني “يعدي زي ما يعدي البحر” بمعنى أصح يعني.. هي دي إمكانياتهم بيأديها بقلبه، بيأديها بروحه، بيأديها بكل ما يقدر يتكلم فيها”.
و اشار شحاتة: “الحتة البسيطة دي جداً بعيدة عن المدربين الأجانب، ما إحنا ياما جبنا مدربين أجانب وما ينفعوش، وياما أخدنا لعيبة ومدربين لسه مخلصين دلوقتي كورة بس مصريين، هو ده اللي إحنا عاوزين نقول عليه يا ميدو. إن النهاردة المدرب الأجنبي يعني بيجي بياخد قرش، وإحنا مش هنقولك ما تاخدش، لا خد واقبض وكل حاجة، بس قوم بالواجب كما ينبغي مع فرقتك ومع لعيبتك.
وأكد:” المدرب المصري صاحب فكر، طبعاً، صاحب كل حاجة. عاوز يعمل إيه المدرب المصري؟ يعني هو الأساس؛ اتدرب، اتعلم، وصل لمرحلة معينة من دراسته للعيبته، هو فاهم اللعيبة المصريين وبيأدي على الأساس ده، وبأقل الإمكانيات ما بيكلفش النادي فلوس كتير”.
وأختتم:” المدرب اللي يجي نادي الزمالك أو أي نادي في مصر ويفرض عليه شروط، ماتخدوش. خد المدرب اللي هو زي مثلاً إيه.. أنا لما رحت المقاولون العرب (معلش هذكر نفسي المرة دي)، قالوا لي تاخد كام يا كابتن؟ قلتلهم بصوا: اللي تدفعوه. والله قلتلهم اللي تدفعوه. كان المهندس محمد عادل تقبض كام؟ قلت مش هقبض حاجة، اللي تدفعوه بس بعد ما أحقق النتائج اللي أنتم محتاجينها”.
