كشف الإعلامي أحمد حسام ميدو عن كواليس مقترحه لمسئولي الزمالك خلال فترة تواجده في وقت سابق داخل الفارس الأبيض.
وقال ميدو، خلال تصريحات عبر قناة “النهار”:” “تواجد الكابتن ناصر عباس حكمنا الدولي السابق، وأقول لكم المشكلة مش في الفكرة، المشكلة في آليات تنفيذها”.
و أردف:” في كل نادي في العالم بالذات الأندية الكبيرة بيعينوا رسمياً مستشار تحكيمي للنادي، وكان لازم النادي الأهلي يعين كابتن ناصر عباس مستشاراً تحكيمياً للنادي قبل ما أطلع بكرة إن هو لازم يبقى متواجد جوه الاجتماع، ساعتها كان هيبقى ليه صفة رسمية بحضور الاجتماع”.
وواصل ميدو: “طب هل الكلام اللي أنا بقوله ده كلام أنا بقول لكم أي كلام، ولا الكلام ده فعلاً موجود؟ لو شفتوا حضراتكم هتلاقوا إن ريال مدريد على سبيل المثال عنده مستشار تحكيمي رسمي معين وبيقبض وبياخد مرتب من النادي، ومتواجد في كل المباريات وبينزل الملعب قبل المباريات وبيقف مع الحكام، وفي حالة حدوث مشكلة بيبقى هو أول واحد بيتكلم مع الحكام، وفي حالة مخاطبة اتحاد الكورة أو رابطة الأندية هو اللي بيخاطب رابطة الأندية بنفسه عشان يبقى ليه صفة رسمية”.
و أشار:” كارلوس ميخيل دافيا المستشار التحكيمي لريال مدريد، وأنا بضرب لكم مثل بريال مدريد لأنه نادي معروف عنه إنه نادي منظم ما بيفتوش أي حاجة، كل تفصيلة بيهتموا بيها. اللي قدام حضراتكم ده المستشار التحكيمي لريال مدريد وقدام حضراتكم أهو في إحدى المباريات واقف بيتكلم مع الحكم، بيحمي وبيحافظ على حقوق النادي من خلال صفة رسمية”.
وشدد ميدو: “إحنا هنا بنفذ فكرة بس إيه بننسى آلياتها المفروض تتنفذ إزاي. وأنا في فترة تواجدي داخل نادي الزمالك أول حاجة طلبتها من نادي الزمالك إن لازم يبقى في مستشار تحكيمي للنادي، كحكم دولي سابق يكون هو المسؤول عن مخاطبة اتحاد الكورة ومخاطبة لجنة الحكام عند حدوث أي مشكلة للنادي أو أي خطأ تحكيمي أو أي اعتراض للنادي على أي قرار في أي مباراة”.
وأكد:” أنا فاكر إن أنا ساعتها طلبت بالاسم إن اللي يبقى المستشار التحكيمي لنادي الزمالك هو الكابتن ياسر عبد الرؤوف. طلبت رسمياً من مجلس الإدارة إن الكابتن ياسر عبد الرؤوف يعين المستشار التحكيمي للنادي، ليه؟ عشان الحكام ليهم لغة مع بعض، يبقى راجل حافظ القانون، يبقى راجل لما تستشيره هل الموقف اللي أنا داخل فيه خناقة يستدعي ولا لأ، وإيه هي حجتي وأنا بستند لإيه قانونياً”.
و أكمل ميدو: “لازم زي ما أنت ليك مستشار إعلامي.. مش كل نادي ليه مستشار إعلامي أو حد مسؤول عن الإعلام؟ التحكيم النهاردة إحنا عارفين كويس جداً إن هو جزء كبير من اللعبة، وجزء كبير من المشاكل اللي ممكن تواجهني. فالمشكلة مش في وجود الكابتن ناصر عباس، بالعكس أنا شايف إن لازم يبقى في حد مسؤول موكل من النادي يكون بيفهم في التحكيم ويكون بيفهم في القوانين اللي بتتغير وايه القوانين الجديدة”.
وزاد:” ويكون المستشار التحكيمي ده هو اللي مسؤول عن إعطاء التعليمات للجهاز الفني والإداري واللاعبين داخل النادي بتطورات وتحديثات قوانين كرة القدم. زي ما حضراتكم عارفين إن كل سنة وكل فترة بيحصل تطورات وبيحصل تحديث، لسه دلوقتي بتطبق فكرة إن اللعيب مش هيتحسب التسلل من جزء من جسمه، إن هو لازم جسمه كله يكون متخطي المدافع”.
و أنهى: “كل ده المستشار التحكيمي بتاع النادي هو اللي بيبقى مسؤول عنه. فأنا بطالب كل الأندية بالذات الأندية القادرة مادياً إن هي تقدر تعين مستشار تحكيمي للنادي، لازم يبقى في مستشار تحكيمي رسمي للنادي.”
