فتح شريف حازم، لاعب الأهلي السابق، النار على عدد من لاعبي الفريق الأحمر بعد الهزيمة الثقيلة أمام بيراميدز بثلاثة أهداف دون رد في بطولة الدوري المصري الممتاز، حيث وجّه انتقادات حادة لأداء بعض اللاعبين وسلوكهم داخل وخارج الملعب، معتبرًا أن هناك غيابًا واضحًا في الروح والالتزام داخل الفريق.
وقال شريف حازم خلال استضافته في برنامج «اللعيب» عبر قناة «إم بي سي مصر»: “أنا عايز بس أوجه رسالة لزيزو وإمام عاشور، بالنسبة لي الأول إمام عاشور مش شبه النادي الأهلي، أنا زعلت جدًا لما راح الأهلي، الراجل ده غلط قبل كده في حق الكابتن صالح سليم، وقلت قبل كده إن الأهلي كان لازم ما يلاقيهوش في المطار، وطريقة تعامل النادي معاه خلت هيبة الأهلي تقل، ده أول نقطة”.
وتابع: “النقطة التانية زيزو، أنا مش بتكلم في الفنيات، وارد أكون موفق ووارد أضيع، الكورة توفيق من ربنا، لكن موضوع القلب مش توفيق، القلب محتاج واحد عنده إحساس وعنده دم”.
وأضاف: “إنت امبارح بعد الماتش لابس تيشيرت بيراميدز على كتفك؟ إنت بتهزر؟ أي لاعب كان عايز التيشيرت ده بعد الماتش ادّهوله في أوضة اللبس يا حبيبي، ليه تستفز الناس كده؟ إحنا خسرانين 3، لازم يكون عندك وعي وتديهوله في أوضة اللبس مش قدام الناس، وتراعي إحساس الجمهور”.
وواصل: “وبالنسبة لي في نقطة تالتة، الكابتن طارق سليم، والكابتن سيد عبد الحفيظ، والكابتن علاء عبد الصادق، والكابتن ثابت البطل، كلهم كان عندهم شخصية الأهلي لما كانوا مديري كورة، كانوا شبه بعض في حاجات مش موجودة دلوقتي خالص”.
واستكمل: “الكابتن وليد صلاح الدين مش مناسب يبقى مدير كرة في الأهلي، معندوش شخصية مدير كرة، أنا مش بتكلم عن إنه لاعب حلو جدًا وأحرف لاعب جه مصر، لكن أنا هعمل بيه إيه في المنصب ده؟ مش هيضيف حاجة”.
وأشار: “في 2015 كنا بنلعب ماتش الزمالك والأهلي، اللي مؤمن زكريا سجل فيه هدفين، وأنا كنت بلعب وقتها، والكابتن حسام غالي كان دكر، وقالنا مينفعش المنافس يفرح قدامنا، يفرحوا بعد الماتش، وكان الزمالك ناوي يحتفل بالدوري قدامنا، ومع ذلك كسبنا 2-0”.
واختتم: “أنا متضايق جدًا من المنظر، فين الروح؟ إحنا كنا جيل أقل في الإمكانيات من الجيل ده، بس كنا بنموت نفسنا في الملعب، الروح كانت موجودة حتى وإحنا بنخسر، أنا مش بتكلم في الإمكانيات بس، مفيش حد عنده دم غير تريزيجيه لأنه متربي في النادي، الباقي للأسف مفيش عندهم الروح دي”.
